Francuzski komik Djedane Mbała Mbała, vykazvańni jakoha z nahody akcyi «Ja - Šarli» i masavych manifiestacyj u pamiać achviar teraktaŭ i ŭ abaronu svabody słova pryciahnuli ŭvahu pravaachoŭnych orhanaŭ, byŭ aryštavany ŭ Paryžy ŭ sieradu, 14 studzienia.
Global Look Press
Padstavaj dla zatrymańnia stała ŭžo vydalenaja publikacyja ŭ Facebook, u jakoj komik pisaŭ, što adčuvaje siabie «Šarli Kulibali» (teraryst Amied Kulibali, vinavaty ŭ hibieli piaci čałaviek).
«My nie pavinny błytać svabodu mierkavańniaŭ i antysiemityzm, rasizm i admaŭleńnie Chałakosta», — adreahavaŭ na situacyju premjer-ministr Francyi Manuel Vals.
Djedane uziaty pad vartu pa abvinavačvańni ŭ papuščalnictvie teraryzmu. Pa zakonie, aryšt moža być pradoŭžany da 48 hadzin.
Raniej humaryst raźmiaściŭ u sacsietkach list, u jakim daje tłumačeńni z nahody svajoj pazicyi. Jon piša, što padčas maršu, u jakim pryniali ŭdzieł 1,5 młn čałaviek, usie jaho ŭdzielniki ŭśviedamlali siabie «Šarli» i adčuvali adzinstva. Ale kali jon viartaŭsia nazad — vostra adčuvaŭ siabie adzinokim i pieraśledavanym. Jon uspomniŭ, što jaho padviarhajuć pravierkam, ckujuć u ŚMI i nazyvajuć «voraham numar adzin». Vychodzić, pisaŭ Djedane, da jaho staviacca nie jak da «Šarli», choć jon taksama pakutuje za svabodu słova. Chutčej, jaho pieraśledujuć i trecirujuć jak terarysta Kulibali.
Raniej Djedane nie raz abvinavačvaŭsia ŭ antysiemityźmie, a francuzskija ŭłady pastajanna zabaraniajuć jaho vystupleńni. Ličycca, što Djedane vystupaje za isłamizacyju Francyi.
