Minzdaroŭja: Treba zabaranić prodaž enierhietyčnych napojaŭ dzieciam
Nieabchodna zabaranić prodaž enierhietyčnych napojaŭ dzieciam, zajaviŭ hałoŭny narkołah Ministerstva achovy zdaroŭja Biełarusi Ivan Kanarazaŭ na pasiadžeńni kruhłaha stała ŭ Minsku 23 studzienia.
«Ja nie baču nijakaha supraćstajańnia pamiž Ministerstvam achovy zdaroŭja i vytvorcami enierhietyčnych napojaŭ, –– skazaŭ jon. –– Na ŭpakoŭcy napisana, što dzieciam spažyvańnie takich napojaŭ nie pakazana. U našym hramadstvie dzieci nie majuć patreby ŭ pryjomie rečyvaŭ-stymulataraŭ».
Kanarazaŭ adznačyŭ važnaść rastłumačalnaj pracy ŭ častcy kultury charčavańnia i spažyvańnia tych ci inšych napojaŭ. Važna, kab ludzi razumieli, što zališniaje spažyvańnie nie sadziejničaje zachavańniu zdaroŭja. «Svajmu dziciaci ja tłumaču, što nie varta pić ni kavu, ni harbatu», –– skazaŭ jon.
Zahadčyca łabaratoryi vyvučeńnia statusu charčavańnia Kaciaryna Fiedarenka adznačyła, što jość navukovaje adnaznačnaje rašeńnie: kafiein i ałkahol nielha sumiaščać u adnym napoi. Jana adznačyła taksama, što ŭ mnohich ludziej jość indyvidualnaja adčuvalnaść da kafieinu, niekatoryja «nieadekvatna reahujuć navat na nievialikija dozy kafieinu, vydajučy niehatyŭnyja efiekty z punkta hledžańnia kardyjavaskularnaj sistemy i h. d.».
Namieśnik hałoŭnaha ŭrača Respublikanskaha centra hihijeny, epidemijałohii i hramadskaha zdaroŭja Ludmiła Narojčyk rastłumačyła, što ŭ Biełarusi razhladajecca mahčymaść zabaranić prodaž enierhietyčnych napojaŭ z utrymańniem ałkaholu dzieciam da 18 hadoŭ, a taksama abmiežavać rekłamu enierhietyčnych napojaŭ. «Jość padstavy sumniavacca ŭ biasškodnaści kafieinu va ŭździejańni na dziaciej, ciažarnych žančyn», –– skazała Narojčyk. Jana adznačyła, što «pry pryniaćci ŭzvažanaha kančatkovaha rašeńnia ekanamičny składnik budzie ŭličvacca».
Pra inicyjatyvu zabaranić prodaž enierhietyčnych napojaŭ padletkam razmova išła na pasiadžeńni mižviedamasnaha savieta pa papiaredžańni i prafiłaktycy pjanstva, ałkahalizmu, narkamanii i spažyvańni tytuniu ŭ listapadzie 2014 hoda. Biełaruskija čynoŭniki asnoŭnuju ryzyku dla zdaroŭja ad spažyvańnia enierhietykaŭ źviazvajuć z vysokim utrymańniem ŭ ich kafieinu. Razam z tym pradstaŭniki biźnies-supolnaści vykazvajuć zakłapočanaść mahčymym abmiežavańniem u Biełarusi prodažu enierhietyčnych napojaŭ.
Kamientary