Sielskija žančyny Biełarusi čaściej naradžajuć dziaciej nie ŭ šlubie, čym haradskija
U Biełarusi dziaciej nie ŭ šlubie čaściej naradžajuć žycharki sielskaj miascovaści. Takija danyja pryvodziacca ŭ apošnim numary «Ekonomičieskoho biulletienia», jaki vydajecca Navukova-daśledčym ekanamičnym instytutam Ministerstva ekanomiki.
«Isnuje dyfierencyjacyja pamiž haradskim i sielskim nasielnictvam pa ŭzroŭni pazašlubnaj naradžalnaści: u sielskich žančyn naradžeńnie dziaciej pa-za šlubam adbyvajecca ŭ 1,5 razu čaściej, čym u haradskich», — havorycca ŭ «Ekonomičieskom biulletienie».
Jak adznačajuć śpiecyjalisty NDEI Minekanomiki, u razrezie rehijonaŭ dola pazašlubnych dziaciej roznaja.
«U rehijanalnym razrezie vysoki pakazčyk naradžalnaści pazašlubnych dziaciej zachoŭvajecca ŭ Mahiloŭskaj (21,8%), Homielskaj (21%) i Viciebskaj (19,2%) abłaściach, samy nizki — u Minsku (11,8%), Bresckaj i Hrodzienskaj abłaściach (12% i 12,2% adpaviedna)», — kanstatujuć u NDEI Minekanomiki.
Aŭtary ahladu źviartajuć uvahu na toje, što ŭ sielskich rehijonach krainy (pavodle danych za 2013 hod) kala 45% pazašlubnych dziaciej naradžalisia ŭ žančyn va ŭzroście da 25 hadoŭ.
Raniej pradstaŭniki NDEI adznačali, što demahrafičnyja prablemy, ź jakimi sutyknułasia Biełaruś, pryviaduć da skaračeńnia ekanamična aktyŭnaha nasielnictva.
«Pry zachavańni vyznačanych tendencyj da 2030 hoda kraina stracić prykładna 600 tys. pracoŭnaha patencyjału (heta raŭnaznačna źniknieńniu troch haradoŭ, anałahičnych Babrujsku). Pry hetym čakajecca chutkaje skaračeńnie kolkaści pracazdolnaha nasielnictva ŭ pieryjad da 2025 hoda, i tolki ŭ treciaj piacihodcy (2026—2030 hady) praces prypynicca», — zajaviŭ dyrektar Navukova-daśledčaha ekanamičnaha instytuta Minekanomiki Alaksandr Čarviakoŭ padčas niadaŭniaj kanfierencyi pa pytańniach prahnazavańnia ekanamičnaha raźvićcia.
Pavodle jaho słoŭ, u vyniku skaračeńnia pracazdolnaj častki nasielnictva moža adbycca rost demahrafičnaj nahruzki amal u 1,4 razu (z 422 u 2015 hodzie da 576 čałaviek starejšych uzrostaŭ na 1.000 pracazdolnych hramadzian u 2030 hodzie).
Kamientary