Hety artykuł ja źbirałasia pisać adrazu paśla prahladu filma «Kingsman», dzie adnym z praviłaŭ hałoŭnaha ahienta sakretnaj słužby, rolu jakoha vykonvaje manierny i jak zaŭsiody biezdakorny Kolin Fiort, było «oksfardy — nie brohi». Nie kožny zrazumieŭ ź pieršaha razu, što razmova idzie pra abutak.
Heta tolki adna z cytat, jakaja ŭžo razyšłasia ŭ prastorach internetu ŭ jakaści aformlenych pravił džentlmienaŭ kštałtu: «maniery — tvar mužčyny» ci «zbroja džentlmiena — jahony stroj» — usio adtul.
Mahčyma, vam nie vielmi i patrebna viedać roźnicu pamiž vidami mužčynskaha abutku, jaki, akazvajecca, vychodzić za miežy ŭtryravanaha «tufli, makasiny, krasoŭki», ale ŭsio ž taki takija viedy karysnaja choć by dla taho, kab adčuć siabie znaŭcam padčas prahladu hetaha filma.
U hetym artykule ja zasiarodžusia na troch asnoŭnych vidach mužčynskaha abutku, jakija ličacca samymi kłasičnymi: oksfardy, brohi i derbi.
1. Oksfardy
Heta numar adzin siarod usiaho inšaha. Heta nieŭmiručaja kłasika, jakuju paradziła Anhlija ŭ XVIII stahodździ, i jakaja stała lubimym vidam abutku ŭ studentaŭ Oksfarda.
Oksfardy — heta samyja kłasičnyja i samyja strohija čaraviki, jakija adroźnivaje zakryty vid šnuroŭki.
Šnuroŭka – heta, darečy, adzin z asnoŭnych kryteraŭ, pa jakich adroźnivajuć abutak.
Varta viedać, što jana byvaje adkrytaj i zakrytaj. Usio heta hučyć ciažkavata, ale ja vieru ŭ toje, što heta možna asilić.
Kali vy zmožacie pravieści palcam pa čaraviku ad vierchniaj častki jazyčka da naska abutku, nie sustrakajučy nijakich pieraškod, to heta adkrytaja šnuroŭka, bo bakaviny biez šnurkoŭ svabodna razychodziacca (vierahodniej za ŭsio, vy trymajecie ŭ rukach derbi). Kali vaš palec uprecca ŭ bližejšaje papiaročnaje švo, pad jakoje ŭšytyja bakaviny ź dziračkami dla šnurkoŭ, i bakaviny razyścisia nie mohuć, u vašych rukach oksfardy.
Asnoŭnyja kolery oksfardaŭ — čorny i karyčnievy, jakich i varta prytrymlivacca pry vybary abutku pad vaš stroj.
Heta mienavita toj abutak, jaki varta apranać da fraka, smokinha i «pratakolnaha» stroju. Ale aściarožniej z łakavymi oksfardami: ich možna apranać tolki da fraka i nijak inakš. Bo kali vy apraniecie łakavyja oksfardy da zvyčajnaha smokinha ci stroju, vy budziecie vyhladać prykładna hetak ža, jak dziaŭčyna ŭ viečarovaj sukiency padčas pracy ŭ ofisie. Tamu aściarožniej.
2. Brohi
Kali chtości ŭpieršyniu sprabuje razabracca ŭ kłasifikacyi mužčynskaha kłasičnaha abutku, hałoŭnaja błytanina zaŭsiody ŭźnikaje ŭ adnym i tym ža: vyśviatlajecca, što vielmi padobnyja adzin na adnaho čaraviki nazyvajucca całkam pa-roznamu. I kab nie akazacca ŭ takim zabłytanym stanoviščy, treba viedać, pra toje, što, akramia kryteraŭ šnuravańnia, isnuje druhi kryter, jaki hetak ža padzialaje abutak — najaŭnaść abo adsutnaść dekaratyŭnaj pierfaracyi. Hety kryter isnuje paralelna ź pieršym. Kali čaraviki choć minimalna ŭpryhožany pierfaracyjaj, to heta — brohi.
Pry hetym brohi mohuć być jakija zaŭhodna: choć zašnuravanyja oksfardy ci tyja ž derbi, pra jakija budzie iści razmova dalej. Usia fiška tolki ŭ dziračkach, jak by banalna heta nie hučała.
Treba viedać, što pierfaracyja ŭžo ŭ lubym vypadku panižaje hradus aficyjnaści čaravikaŭ. Da i brohi, jakija nam ciapier zdajucca takimi vysakarodnymi i pryhožymi, pajšli zusim nie z arystakratyčnaha siamiejstva. Ličycca, što taki abutak z maleńkimi adtulinami stali rabić dla patreb šatłandskich i irłandskich žyviołahadoŭcaŭ, jakija šmat chadzili pa syroj travie i bahnie, i jakim patrabavaŭsia abutak, što chutka vysychaje. Ale tyja sialanskija brohi, pra jakija idzie havorka, vyhladali značna mienš vytančana, čym ciapierašnija. Z časam brohi stali bolš vykštałconymi i ź vialikaj kolkaściu detalaŭ. Tak, dziakujučy hetamu doŭhamu šlachu, brohi stali toj raznavidnaściu mužčynskaha abutku, jakija vyhladajuć najbolš składana. U brohach šmat detalaŭ, padrabiaznaściaŭ, elemientaŭ.
Čym mienš na abutku dekoru i čym jon ciamniejšy, tym bolš strohim jon ličycca. Tamu čornyja ci ciomna-karyčnievyja brohi ŭžo padyduć i da dziełavoha kaściuma. Kali, jany, viadoma, načyščanyja i na prystojnaj padešvie. Ale najbolš jany buduć pasavać dla ofisa.
Kab prytrymlivacca bałansu i harmaničnaści linij, nie varta nasić brohi z zanadta vuzkimi štanami, inakš nohi buduć vyhladać niepamierna vialikimi.
3. Derbi
Asnoŭnaje adroźnieńnie ad oksfardaŭ znoŭ taki ŭ šnuroŭcy.
Derbi (anhł. derby shoes) — tufli z adkrytaj šnuroŭkaj, u jakich bakaviny našytyja nad piaredniaj častkaj.
To bok, uzhadvajučy papiaredniaje apisańnie vidaŭ šnurovak, heta toj, kali vy možacie pravieści palcam ad pačatku jazyčka da naska abutku, nie sustreŭšy papiarečnych švoŭ. Z-za hetaj šnuroŭki derbi ličacca mienš aficyjnymi i vyhladajuć časam davoli hruvastkimi. Derbi ŭ svaju čarhu mohuć być i ź pierfaracyjaj, to bok derbi-brohi.
Dla taho, kab było zrazumieła: derbi i oksfardy — heta kłasifikacyja abutku pa vyhladzie šnuroŭki, a brohi i nie-brohi — kłasifikacyja pa najaŭnaści i adsutnaści pierfaracyi.
Na inšym vidzie mužčynskaha kłasičnaha abutku ja zasiarodžusia ŭ nastupnym artykule.
Zdajuć u arendu katedž zahinułaha chakieista Cypłakova ŭ Drazdach. Voś interjery FOTY19
Kamientary