Mižnarodnaja śledčaja hrupa, jakaja pravodzić rasśledavańnie abstavinaŭ hibieli 17 lipienia 2014 h. małajzijskaha avijałajniera nad ŭschodniaj Ukrainaj, paviedamiła pra toje, što jana šukaje vidavočcaŭ, jakija bačyli zienitna-rakietny kompleks «Buk».
Śledčaja hrupa apublikavała ŭ internecie zvarot na niekalkich movach, u tym liku — na ruskaj i ŭkrainskaj, u jakim prosić śviedak źviazacca ź joj pa biaspłatnym telefonnym numary abo z dapamohaj elektronnaj pošty.
Bolš padrabiaznaja infarmacyja źmiaščajecca ŭ apublikavanym na partale YouTube videa, u jakim raspaviadajecca pra najbolš vierahodnuju — z punktu hledžańnia śledstva — viersiju, zhodna ź jakoj rejs MH17 z Amsterdama ŭ Kuała-Łumpur byŭ źbity rakietaj, vypuščanaj z «Buka».
Zienitna-rakietny kompleks «Buk», jak miarkujecca, znachodziŭsia na terytoryi, jakaja kantralavałasia prarasijskimi sieparatystami.
Śledčych u suviazi z hetym cikavić infarmacyja ab transparciroŭcy ZRK «Buk» na ciahačy «Volva».
Chto bačyŭ bieły ciahač?
Biełym ciahačom «Volva», jak ličyć śledčaja hrupa, sieparatysty supraćpraŭna zavałodali na adnym z pradpryjemstvaŭ Daniecka.
Kompleks «Buk» byŭ zaŭvažany na ŭschodzie Ukrainy 17 i 18 lipienia 2014. Jak skazana ŭ zvarocie, 17 lipienia jon na husieničnych kołach pierasoŭvaŭsia ŭ rajonie horada Śniežny.
Akramia hetaha, jak paviedamlajecca, śledstva cikavić infarmacyja ab asobach, jakija majuć dačynieńnie da nabyćcia, transparciroŭki i zapusku rakiety z hetaha «Buka».
Jak padkreślivajecca ŭ zvarocie, Mižnarodnaja śledčaja hrupa, u jakuju ŭvachodziać ekśpierty z Aŭstralii, Hałandyi, Bielhii, Małajzii i Ukrainy, hatovaja harantavać biaśpieku śviedak.
Zhodna ź infarmacyjaj, jakaja źmiaščajecca ŭ videazvarocie hrupy, ciahač «Volva» jechaŭ z nasielenaha punkta Paŭnočny ŭ Danieck i paśla nakiravaŭsia da rasijskaj miažy. Śledstva šukaje śviedkaŭ, jakija bačyli hety ciahač i ZRK «Buk» nočču, albo ranicaj 17 lipienia 2014 h.
Apublikavanaje na YouTube videa ŭtrymlivaje taksama zapisy telefonnych razmovaŭ pamiž sieparatystami, na padstavie jakich śledstva robić vysnovu, što ZRK «Buk» razam z ekipažam transpartavaŭsia pa terytoryi, kantralavanaj prychilnikami samaabvieščanych DNR i ŁNR, i byŭ zatym pierapraŭleny na terytoryju Rasii.
Jak padkreślivajecca ŭ videazvarocie, lubaja infarmacyja, jakaja adnosicca da hetych padziejaŭ, moža dapamahčy rasśledavańniu abstavinaŭ hibieli rejsa MH17.
U vyniku katastrofy «Boinha» Malaysia Airlines zahinuli ŭsie 298 čałaviek, jakija znachodzilisia na borcie.
Prychilniki samaabvieščanych Danieckaj i Łuhanskaj «narodnych respublik» admaŭlajuć svajo dačynieńnie da hetaj trahiedyi.
Ciapier čytajuć
Ryta Dakota nabyła dom za niekalki miljonaŭ dalaraŭ kala Halivuda15
Ryta Dakota nabyła dom za niekalki miljonaŭ dalaraŭ kala Halivuda
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1515
Kamientary