Mahiloŭski žurnalist Alaksandr Burakoŭ źviarnuŭsia ŭ Viarchoŭny sud
U Mahilovie niezaležny žurnalist Alaksandr Burakoŭ 30 sakavika adpraviŭ nahladnuju skarhu ŭ Viarchoŭny sud z prośbaj admianić sudovaje rašeńnie ab pryciahnieńni jaho da administracyjnaj adkaznaści pa abvinavačvańni ŭ niezakonnym vyrabie pradukcyi ŚMI.
16 vieraśnia 2014 hoda siem supracoŭnikaŭ milicyi praviali ŭ kvatery žurnalista vobysk. Jany kanfiskavali dva noŭtbuki, što naležali žoncy Burakova. Vobysk byŭ taksama praviedzieny ŭ kvatery baćkoŭ Burakova, dzie milicyjaniery kanfiskavali dva sistemnyja błoki kampjutaraŭ. U pastanovie na vobysk było ŭkazana, što Burakoŭ supracoŭničaŭ z sajtam radyjo «Niamieckaja chvala» biez akredytacyi.
Paśla Burakoŭ byŭ abvinavačany ŭ tym, što jaho artykuł «Ściažynaj kantrabandysta: ci pracujuć rasijskija sankcyi na pamiežžy» apublikavaŭ internet-sajt radyjostancyi «Niamieckaja chvala». Heta, na dumku pravaachoŭnikaŭ, źjaŭlajecca pravaparušeńniem pa častcy 2 artykuła 22.9 KoAP (niezakonny vyrab pradukcyi ŚMI).
8 kastryčnika sudździa suda Leninskaha rajona Alena Vołkava aštrafavała Burakova na 6 miljonaŭ rubloŭ, pryznaŭšy jaho vinavatym u pravaparušeńni. 20 listapada sudździa Mahiloŭskaha abłsuda Michaił Mielnikaŭ pakinuŭ biez zadavalnieńnia kasacyjnuju skarhu Burakova. Kiraŭnik abłsuda Ihar Praško 10 sakavika nie ŭhledzieŭ parušeńniaŭ z boku padnačalenych u spravie Burakova i taksama adchili ŭjaho skarhu.
Skarha na 23 staronkach — heta svojeasablivaja kalektyŭnaja praca žurnalistaŭ, pravaabaroncaŭ, a taksama jurystaŭ Biełaruskaj asacyjacyi žurnalistaŭ, raskazaŭ Alaksandr Burakoŭ.
«My arhumientavana dakazvajem, što praca žurnalista biez akredytacyi chacia i źjaŭlajecca parušeńniem, ale za jaje nie praduhledžana adkaznaść. Taksama skład maich dziejańniaŭ nie padpadaje pad toj artykuł, u parušeńni jakoha mianie abvinavačvajuć, pakolki ja naohuł nie vyrablaŭ pradukcyju ŚMI. Heta novy momant u paraŭnańni z papiarednimi skarhami», — zajaviŭ niezaležny žurnalist, zaznačajučy, što ŭ skarzie padrabiazna i łahična dakazvajecca, što asobnych žurnalistaŭ naohuł nielha pryciahvać da adkaznaści pa hetym artykule.
Alaksandr Burakoŭ spadziajecca, što Viarchoŭny sud, vykonvajučy stroha litaru zakona, pavinien budzie admianić rašeńni nižejšych sudovych instancyj. U vypadku kali sud pakinie ŭsio ŭ sile, žurnalist nie vyklučaje padačy skarhi ŭ Kamitet AAN pa pravach čałavieka.
Kamientary