Kanstancin Myśliviec

8 krasavika demakratyčnaja hramadzkaść Drahičynščyny raźvitałasia z Kanstancinam Myśliŭcom, što z kanca 1980-ch braŭ aktyŭny ŭdzieł u nacyjanalnym ruchu na Paleśsi. Raźvitacca ź im pryjechali aktyvisty BNF z usioj Bieraściejščyny, siabry inšych demakratyčnych arhanizacyjaŭ. List sa słovami spačuvańnia i vianok dasłaŭ Alaksandar Milinkievič.

Kanstancin Myśliviec pamior zaŭčasna, ad infarktu, jaki ŭskładniŭsia pneŭmanijaj, mieŭ trochi bolš za 60 hadoŭ. Sioleta vielmi pieražyvaŭ za chadu prezydenckaj kampanii, šmat času pravioŭ u špitali. I toje, što Drahičynski r-n pa kolkaści sabranych podpisaŭ za Milinkieviča staŭ amal urovień z Baranavičami i Pinskam (1000 podpisaŭ), – zasłuha i jaho šmathadovaj addanaj pracy.

Z kanca 1980-ch, kali pačali źjaŭlacca roznyja hramadzkija inicyjatyvy, Kanstancin Myśliviec jak patryjot Paleśsia staŭ aktyvistam zhurtavańnia «Poliśsie». Kali vyjaviłasia avantura jaho kiraŭnika M.Šalahoviča, Kanstancin Myśliviec vystupiŭ adnym ź inicyjataraŭ dałučeńnia siabroŭ hetaj arhanizacyi da strukturaŭ BNF «Adradžeńnie». Jość i jaho zasłuha ŭ tym, što 3/4 siabraŭ «Poliśsia» ź Bieraściejščyny stali siabrami BNF, a jon sam staŭ adnym ź lideraŭ i stvaralnikaŭ Drahičynskaj rajonnaj Rady BNF. U najlepšyja časy ŭ Drahičynskuju arhanizacyju ŭvachodziła kala sotni siabraŭ.

Jašče z časoŭ dziejnaści ŭ HKA «Poliśsie» jon vystupaŭ za praŭdu ab nastupstvach Čarnobylu (častka Drahičynščyny taksama akazałasia zabrudžanaja radyjacyjaj), vystupaŭ suprać budaŭnictva ekalahična niebiaśpiečnaj vytvorčaści (bijachimzavodu) u Drahičynie. Razam z paplečnikami K.Myśliviec namahaŭsia spynić cichuju prychvatyzacyju i inšuju svavolu miascovych čynoŭnikaŭ dy staršyniaŭ kałhasaŭ, jakija pretendavali na rolu čyrvonych panoŭ, nia raz mieŭ praz heta prablemy, byŭ zvolnieny z pracy, ale nikoli nie zdavaŭsia i imknuŭsia dapamahčy vystajać u hetych niaprostych sytuacyjach inšym.

Kanstancin Myśliviec nikoli nie bajaŭsia havaryć toje, što dumaje, ci to heta miascovym čynoŭnikam abo lideram demakrataŭ i vielmi pieražyvaŭ, kali demakratyčnyja lidery nie mahli parazumiecca, adkinuć ułasnyja ambicyi.

Nie mahu nie ŭzhadać jaho słovy na abłasnoj kanferencyi, ŭdzielniki jakoj vybirali pretendenta na adzinaha kandydata ad demsiłaŭ. Vysłuchaŭšy vystup lidera PKB Kalakina, jon skazaŭ nastupnaje: «U nas na Paleśsi balšavikam asabliva nikoli nie daviarali, mnohija sa zbrojaj zmahalisia ź imi jašče i paśla vajny. Nia lubili ich i ŭ majoj siamji, za što i paciarpieli ad ich. Ale siońnia, kali čuju, što sp.Kalakin daje słova, što ciapierašnija kamunisty buduć baranić demakratyju, svabodu słova i niezaležnaść Biełarusi – ja hatovy pacisnuć jamu ruku».

Svaboda, praŭda i spraviadlivaść zaŭsiody byli žyćciovym lozunham hetaha prostaha i addanaha demakratyi čałavieka. Chaču vieryć, što šmathadovy plon pracy K.Myśliŭca nia źniknie na Drahičynščynie, a jaho paplečniki hodna praciahnuć tradycyi miascovaha demakratyčnaha ruchu. Viečnaja pamiać.

Ihar Baranoŭski, Bieraście

• 0
• 0
• 0
• 0
• 0
• 0
• 0
• 0