«Dziaržava, dzie dazvolenaje žorstkaje abychodžańnie z žyviołami, nia zdolnaje vykonvać pravy čałavieka», — adznačajecca ŭ admysłovaj zajavie Centralnaj rady Biełaruskaj partyi «Zialonych».
U svajoj zajavie Centralnaja rada Biełaruskaj partyi «Zialonych» adznačaje niepaśladoŭnaść dziejańniaŭ biełaruskich pamiežnych słužbaŭ: «Jašče 23 studzienia Kamitet pamiežnych vojskaŭ aficyjna smutkavaŭ z nahody, što papuhajaŭ pieravozili «jak šproty u blašankach» i što heta było «čystaje barbarstva», z‑za čaho zahinuli dźvie ptuški. Pradstaŭnik pamiežnaha kamitetu zajaviŭ, što «ptuški buduć pieradadzienyja dla realizacyi ŭ zaalahičnych kramach». Adnak užo 24 studzienia bieraściejskija pamiežnyja veterynary rapartavali pra «utylizacyju» 275 papuhajčykaŭ, što vyžyli, u suviazi «z epidemijalahičnaj sytuacyjaj z ptušynym hrypam u śviecie».
«Takija adnosiny da vysokaarhanizavanych žyvych istotaŭ nia majuć apraŭdańnia. Zabojstva zdarovych ptušak, jakija nia mieli nijakich prykmietaŭ ptušynaha hrypa, źjaŭlajecca barbarstvam i parušeńniem Hramadzianskaha Kodeksu Biełarusi, zhodna jakomu dziaržava albo inšy časovy ŭładalnik bieznahladnych chatnich žyvioł nabyvaje prava vałodać imi tolki ŭ vypadku, kali ciaham šaści miesiacaŭ nie budzie adšukany były ŭładalnik» — havorycca ŭ zajavie BPZ.
Rada partyi padkreślivaje, što vypadki parušeńnia hetaj normy, jak i zabojstva zdarovych žyvioł robiacca zvykłaj spravaj.
Biełaruskaja Partyja «Zialonyja» patrabuje nieadkładnaj raspracoŭki i pryniaćcia Zakonu «Ab achovie žyvioł ad žorstkaha abychodžańnia» zamiest Zakonu «Ab abychodžańni z žyviołami», što na siońnia znachodzicca ŭ parlamencie. «Zialonyja» taksama patrabujuć viartańnia ŭ Kryminalny kodeks kryminalnaj adkaznaści za žorstkaje abychodžańnie z žyviołami, što pryviało da ich śmierci i vykanańnia Hramadzianskaha kodeksa ab achovie bieznahladnych žyvioł. Biez vykanańnia hetych vidavočnych krokaŭ Biełaruś nia moža ličycca ni pravavoj, ni demakratyčnaj dziaržavaŭ, padkreślivajecca ŭ zajavie Centralnaj rady Biełaruskaj partyi «Zialonych».
Minskija ŭłady raskazali, jak buduć zmahacca z «akijanam aŭtamabilaŭ» u dvarach2
Kamientary