AAT «Biełaruskaja kalijnaja kampanija» (BKK), ekskluziŭny trejdar biełaruskaha vytvorcy kalijnych uhnajeńniaŭ «Biełaruśkalij», apublikavała finansavyja vyniki pracy za 2014. Vyručka ad realizacyi za 2014 pavialičyłasia ŭ 63 razy, da 22 trłn 849 młn biełaruskich rubloŭ, čysty prybytak u biełaruskich rublach taksama pakazaŭ vialiki rost u 12,4% — z 5,25 da 5,88 młrd.
Adnak padstaŭ dla aptymizmu u najbujniejšaha pastaŭščyka valutnaj vyručki ŭ biełaruski biudžet nasamreč mała, piša Expert Online.
Bo hod nazad adzin dalar kaštavaŭ 9 945 biełaruskich rubloŭ, a siońnia — 14240. Kali pieraličyć prybytak kalijnaha trejdara ŭ dalarach, to ŭ 2013 hodzie vychodzić $528,3 tysiačy, a ŭ 2014-m — $ 403,8 tys. Takim čynam, realny prybytak BKK u dalarach upaŭ na 24% u rekordnym dla ŭsioj haliny pa abjomach prodažaŭ 2014 hodzie.
Udzielniki rynku i ekśpierty vykazvajuć mierkavańnie, što asnoŭnaj pryčynaj padzieńnia prybytku nie tolki biełaruskich, ale i inšych trejdaraŭ kalijnych vytvorcaŭ źjaŭlajucca dziejańni samoj «BKK». Tak, u spravazdačy Biełaruskaha instytuta stratehičnych daśledavańniaŭ «Kalijnaja halina Biełarusi: pryčyny i nastupstvy razvodu z «Urałkalijem» havorycca, što «kali ŭ 2013 hodzie suśvietnyja ceny na kalij abvaliŭ «Urałkalij», to ŭ 2014 h. užo «Biełaruśkalij» u bolšaj stupieni źbivaŭ suśvietnyja ceny, prapanoŭvajučy svaju pradukcyju za bolš nizkuju canu, čym kankurenty».
Va «Urałkalii», byłym partniory, a ciapier kankurencie «Biełaruśkalija», zajaŭlali, što «destruktyŭnaja» cenavaja palityka «BKK» padryvaje ŭzrovień cenaŭ na kalij «pa ŭsim śviecie». Skasavany ŭ sakaviku kantrakt «BKK» z kitajskimi imparciorami taksama vyklikaŭ krytyku u kankurentaŭ — cana apynułasia ŭsiaho na 3% vyšej letašniaj i skłała $ 315, tady jak inšyja vytvorcy raźličvali na rost 8-10% da minułaha hoda. Ździŭleńnie ŭ suviazi kitajskim kantraktam BKK vykazvali navat indyjskija imparciory, kantrakt ź jakimi jašče nie zaklučany.
Miž tym, spravy ŭ samoha «Urałkalija» ŭ 2014 hodzie taksama išli nie vielmi dobra. Kampanija nie publikuje asobna vyniki pracy svajho trejdynhavymi padraździaleńnia. Sam «Urałkalij» pakazaŭ stratu pa čystaha prybytku ŭ 631 młn dalaraŭ z-za kursavych roźnic, pry hetym vyručka skłała amal 3,6 miljarda dalaraŭ, a abjom prodažaŭ — 12.3 młn ton. Dla paraŭnańnia: vyručka BKK u dalarach pa biahučym kursie skłała 1.56 miljarda dalaraŭ pry abjomie prodažaŭ amal 9,5 miljona ton.
***
AAT «BKK» było stvorana ŭ žniŭni 2013 paśla admovy «Urałkalija» ad sumiesnych prodažaŭ praz ahulnaha trejdara — ZAT «BKK», zasnavanaha razam z «Biełaruśkalijem» u śniežni 2005 hoda. Da admovy «Urałkalija» pracavać praz BKK na dolu sumiesnaha trejdara davodziłasia 43% suśvietnaha ekspartu chłorkaliju.
Kamientary