Kiraŭnik Paŭnočnaj Karei Kim Čen Yn zahadaŭ pakarać śmierciu čatyroch muzykaŭ z nacyjanalnaha arkiestra «Ynchasu». U liku pakaranych - kiraŭnik ansambla. Ich rasstralali ŭ sakaviku pa abvinavačvańni ŭ špijanažy, raspavioŭ ahienctvu Yonhap deputat parłamienta Paŭdniovaj Karei.
Inšy deputat skazaŭ, što muzykaŭ rasstralali za vydaču sakretaŭ siamji Kim Čen Yna. Sami parłamientaryi pra pakarańnie śmierciu daviedalisia ad pradstaŭnikoŭ vyviedki.
Z pačatku hoda ŭ Paŭnočnaj Karei pakarali śmierciu 15 vysokapastaŭlenych čynoŭnikaŭ, paviedamlaje ahienctva. U publikacyi vyrazna nie havorycca, ci ŭvachodziać u ich lik zabityja muzykanty. Viadoma, što siarod pakaranych čynoŭnikaŭ - namieśnik ministra pa spravach lesu. Nibyta jon krytykavaŭ palityku Kim Čen Yna ŭ hetaj halinie.
U arkiestry «Ynchasu» vystupała budučaja žonka Kim Čen Yna. U 2013 hodzie źjaŭlalisia paviedamleńni, što niekalki muzykaŭ ź jaho rasstralanyja pa abvinavačvańni ŭ vyrabie parnahrafii. Źjaŭlalisia navat zdahadki, što ich zabili, kab advieści padazreńni ad žonki kiraŭnika KNDR, nibyta taksama ŭ hetym zamiašanaj.
U 2013 hodzie pa zahadzie Kim Čen Yna pakarali śmierciu jaho dziadźku Čan Son Tcheka, adnaho z samych upłyvovych palitykaŭ. Hetuju infarmacyju, u adroźnieńnie ad mnohich inšych paviedamleńniaŭ, aficyjna paćvierdzili ŭ Pchieńjanie.
Kamientary