Va Ukrainie raskryli schiemu pastavak dla rasijskaha VPK, za jakoj staić inžynier ź Biełarusi

Jak paviedamili analityki ŭkrainskaj kampanii Dallas, jakaja vyvučaje funkcyjanavańnie vajskovaj ekanomiki Rasii,

«unikalnaść Adamoviča palahaje ŭ tym, što dziakujučy inžyniernaj adukacyi jon vystupaje nie prosta ahientam u zakupkach, a i techničnym pasiarednikam, zdolnym aceńvać śpiecyfikacyi i jakaść detalaŭ».

U rasśledavańni adznačajecca, što Adamovič pryjšoŭ na MAZ u 1999 hodzie małodšym inžynieram i za 20 hadoŭ vyras da adnaho z klučavych techničnych kiraŭnikoŭ. Da 2018 hoda jon pracavaŭ viadučym inžynieram-kanstruktaram u adździele hałoŭnaha kanstruktara.

U 2023 hodzie jon ačoliŭ kamiercyjny adździeł AAT «Michanavicki łahistyčny centr» — heta źviazanaja ź dziaržavaj struktura, jakaja vykonvaje funkcyi kampanii-prykryćcia i zabiaśpiečvaje zakupki dla vytvorčych linij MAZa.

«Z 2023 hoda Adamovič vykonvaje rolu važnaha pasiarednika, jaki abjadnoŭvaje padsankcyjnych rasijskich vytvorcaŭ z azijackimi pastaŭščykami kampanientaŭ. […] Jaho najvažniejšy klijent — aŭtamabilny zavod «Urał» (UrałAZ), jaki bazujecca ŭ horadzie Mijas Čalabinskaj vobłaści Rasii i vyrablaje vajskovyja hruzaviki dla Uzbrojenych sił», — adznačajecca ŭ rasśledavańni.

Centr Dallas publikuje listavańnie Alaksieja Adamoviča ź mieniedžarami UrałAZa, u jakim abmiarkoŭvajucca krytyčnyja elemienty tranśmisii, jakija niasuć ekstremalnuju nahruzku ŭ bajavych umovach, a taksama šlachi apłaty adpaviednaha kantrakta z kitajskaj Xi'an Xin Sanming Auto Parts Co, bo bank rasijskaha pradpryjemstva pad sankcyjami, raźliki ŭ dalarach stali niemahčymymi. Pastanavili, što za kantrakt zapłaciać kitajskimi juaniami.

Hetaj kitajskaj kampanii taksama prapanavali stvaryć daččynaje pradpryjemstva ŭ svabodnaj ekanamičnaj zonie «Minsk», kab ažyćciaŭlać usie pastaŭki i raźliki praź biełaruskuju jurysdykcyju i takim čynam paźbiahać sankcyj.

Analityki ŭkrainskaha centra miarkujuć, što Adamovič maje pryvilejavanaje stanovišča i moža pracavać pad nahladam KDB. U ich daśledavańni adznačajecca, što jon maje «załaty status» łajalnaści ŭ kampanii «Aerafłot» i tolki ŭ žniŭni 2025 hoda čatyry razy lataŭ u Kitaj.

Anałahičnyja zakupki nibyta dla MAZa biełarus rychtavaŭ i praz paŭnočnakarejskuju kampaniju Chosun Kyonghun 1.

Paralelna sa svajoj dziejnaściu na karyść Rasii, pavodle ŭkrainskich rasśledavalnikaŭ, Adamovič rehistravaŭsia na aficyjnaje sumoŭje ŭ polskim konsulstvie dla atrymańnia Karty palaka — dakumienta, jaki vydajuć asobam polskaha pachodžańnia i jaki adkryvaje šlach dla žycharstva ŭ Polščy i atrymańnia polskaha hramadzianstva. U svajoj zajavie Adamovič paviedamiŭ, što jahonyja dzied i babula byli hramadzianami Polščy, i padaŭ archiŭnyja dokazy ich prysutnaści ŭ śpisach vybarščykaŭ u Siejm Polščy.

• 0
• 0
• 0
• 1
• 1
• 0
• 2
• 0