Ministerstva infarmacyi vyniesła papiaredžańnie partału Tuzin.fm, paviedamlaje sajt muzyčnaha partału.
«Tuzin» u šoku. U liście ź Ministerstva infarmacyi Biełarusi za podpisam ministara Ananič viadziecca pra toje, što ŭładalniku sajtu Tuzin.fm vyniesiena papiaredžańnie «za raspaŭsiud niepraŭdzivaj infarmacyi, jakaja moža nanieści škodu dziaržaŭnym abo hramadskim intaresam», — havorycca ŭ paviedamleńni tuzin.fm
U adkaz na hety list kiraŭnik Tuzin.fm Siarhiej Budkin dasłaŭ u Ministerstva infarmacyi ŭsie źviestki, jakija prosić pradastavić Lilija Ananič.
«Naš partał pracuje ŭžo 12 hod i za hety čas zrabiŭ niamała dla taho, kab pra biełaruskuju muzyku daznalisia jak maha bolej ludziej. My napisali tysiačy materyjałaŭ (praŭdzivych, a jak ža ž jašče!) pra našych vykanaŭcaŭ, pradstavili vializarnuju kolkaść piesień i albomaŭ, praviali z sotniu kancertaŭ, realizavali dziasiatki hramadska-značnych prajektaŭ, siarod jakich «Pierazahruzka», «Apošni zołak», «Tuzin. Niemaŭla», «Zaśpiavaj.by». I heta prosta niamyślima pačuć paśla hetaha ad čynoŭnikaŭ, što my škodzim dziaržaŭnym i hramadskim intaresam. My vielmi spadziajemsia, što z boku Ministerstva vyjšła niedarečnaść i jana budzie papraŭlena ŭ chutkim časie», — zajaŭlaje z hetaj nahody Siarhiej Budkin.
Situacyju prakamientavaŭ kiraŭnik Biełaruskaj asacyjacyi žurnalistaŭ Andrej Bastuniec. «Heta nie pieršy vypadak, tolki što padobnyja listy atrymała taksama «Radyjo Racyja» i sajt «Svabodny rehijon». Pakul niajasna meta Ministerstva infarmacyi. Mahčyma jany chočuć uziać sajty pad svoj kantrol, a mahčyma zabłakavać. Tearetyčna takaja mahčymaść isnuje».
Kamientary