Žycharka Kobryna: «Zhubiła pašpart, a pa im chtocci kupiŭ šmat valuty»

15 tysiač dalaraŭ plus 11 tysiač 110 jeŭra… Amal paŭtara hoda sprabuje žycharka Kobryna Ina Jurkievič dakazać, što da hetaj vializnaj sumy nie maje nijakaha dačynieńnia: nie jana, a chtości pa jaje zhublenym pašparcie kupiŭ u banku valutu. Ale pazoŭ miascovaj padatkovaj inśpiekcyi ŭsie minułyja pa hetaj spravie sudy pryznali abhruntavanym. Na siońniašni dzień z žančyny pavinny spahnać amal 25 miljonaŭ rubloŭ padachodnaha padatku.

Urok na ŭsio žyćcio

Ciapier sarakahadovaja žycharka rajonnaha centra dakaraje siabie, što svoječasova nie źviarnułasia ŭ pravaachoŭnyja orhany z nahody źnikłaha dakumienta. Jana i chapiłasia pašparta nie adrazu, tamu ni daty, ni abstavinaŭ jaho źniknieńnia jon nie viedaje.

— Adnojčy ŭžo hublała pašpart, ale mnie jaho chutka viarnuli. I kali ŭ adzin z sakavicki dzion u sumcy znoŭ nie znajšła dakumient, paspadziavałasia na dobrych ludziej. A potym atrymała list z adździaleńnia pa hramadzianstvie i mihracyi, što moj dakumient znajšoŭsia. Uzradavałasia, — uspaminaje pačatak sumnaj historyi Ina.

Heta zdaryłasia ŭ vieraśni 2012-ha. A praz hod jak abuchom pa hałavie — vyklik u IMPZ. Tam žančynie i patłumačyli, što, akazvajecca, jašče 2 červienia 2012 u adnym z bankaŭ Kobryna joju była nabyta bujnaja suma dalaraŭ i jeŭra. A tamu varta dać spravazdaču pa prybytkach. Jana nie viedała, ci to śmiajacca, ci to płakać. U daŭhach jak u šaŭkach, adna vychoŭvaje dačku-školnicu, z dachodaŭ tolki ścipłaja zarpłata i alimienty. Va ŭsim davodzicca siabie admaŭlać, tamu što treba raźličvacca za kredyt na kvateru.

— Jakija tut śviatki, kali łupiać padatki… A tut paviedamlajuć, što za valutu, jakuju i ŭ vočy nie bačyła, ja pavinna zapłacić padatak — bolš za 53 miljony! I pačalisia maje chadžeńni pa pakutach…

Nadziejna, jak u banku?

Pavažany čytač, napeŭna, zaŭvažyŭ, što pamier padatku, zhadany dvojčy ŭ našym apoviedzie, adroźnivajecca. Tut niama pamyłki aŭtara. Až da maja 2014 hoda va ŭsich pratakołach sudovych pasiadžeńniaŭ i inšych dakumientach fihuravała vialikaja suma — 53.347.400 rubloŭ. Tamu što ŭ pradstaŭlenaj bankam infarmacyi značyłasia: adkazčyca nabyła 30 tysiač dalaraŭ i 22 tysiačy 220 jeŭra.

Niazhodnaja z vysunutymi abvinavačvańniami i, čaho chavać, napałochanaja situacyjaj, Ina u rešcie rešt źviarnułasia z zajavaj u miascovuju prakuraturu. U kancy krasavika minułaha hoda pa rašeńni prakurora Kobrynskaha rajona Alaksandra Pietrasiuka materyjały dla arhanizacyi dadatkovaj pravierki byli nakiravany načalniku RAUS. Voś tady i vyjaviłasia niedakładnaść u bankaŭskich źviestkach, nakiravanych u IMPZ.

Ale heta nie adzinaje niesupadzieńnie, źviazanaje ź infarmacyjaj ad supracoŭnikaŭ banka. Jak vynikaje z pastanovy ab admovie ŭ zaviadzieńni kryminalnaj spravy ad 2014/02/24, apytanaja kasir-śpiecyjalist roźničnych pasłuh, jakaja i pradała vyšejzhadanuju sumu, patłumačyła nastupnaje: valutu ŭ takich vialikich pamierach jana samastojna pradać nie moža, heta adbyvajecca tolki paśla ŭzhadnieńnia z kiraŭnictvam banka. Adnak padčas sudovaha pasiadžeńnia 5 listapada taho ž hoda kasir admoviłasia ad svaich pakazańniaŭ. Nu nie pamiataje jana, ci staviła kiraŭnika ŭ viadomaść z nahody prodažu takoj sumy valuty. Heta byŭ vychodny dzień, «mahčyma, što nie paviedamlała». I naohuł, «kali ŭ banku šmat valuty, vialikuju sumu možna pradać biez ŭzhadnieńnia z kiraŭnikom». Pra toje, što nijakaj zajaŭki i ŭzhadnieńnia nie patrabujecca dla kupli valuty ŭ takim pamiery, paćvierdziŭ na sudzie i śpiecyjalist pa biaśpiecy i abaronie infarmacyi RKC banka. A Ina ździŭlajecca: «U 2012-m u Kobrynie takuju sumu nabyć voś tak było prosta? Dy jašče ŭ subotu ŭ kancy pracoŭnaha času banka! Kali b chto-niebudź z haradžan zmoh dapamahčy mnie dakazać advarotnaje! Raptam chtości kuplaŭ valutu tady i viedaje paradak …»

Nielha zmaŭčać i pra toje, što jašče skazała kasir: «Tearetyčna dapuskaju, što ja tady mahła pamylicca i pradać valutu inšaj asobie, kali vizualna čałaviek byŭ padobny da fota ŭ pašparcie, i ja … pradała valutu» (z pratakołu sudovaha pasiadžeńnia).

Niališnim budzie zaŭvažyć, što śviedka na toj momant užo nie pracavała ŭ banku. Pa słovach Iny, na sudzie i paviedamiła, što siadzić biez pracy, pryjšłosia syści. U tym liku i z-za hetaha valutnaha incydentu. Miž tym śpiecyjalist daśviedčany, na pasadzie kasira ŭ dadzienym banku pracavała z 1995 hoda pa červień 2014.

«Ja hatovaja praciahvać baraćbu»

Vialikija nadziei ŭskładała paciarpiełaja na videazapis, jaki viadziecca ŭ banku, — na žal, videa stolki nie zachoŭvajecca. Vyznačyć miescaznachodžańnie Iny Ściapanaŭny na momant prodažu valuty pa jaje pašparcie (u 14.11 2 červieni 2012) z dapamohaj bilinhu zvankoŭ pa sotavym telefonie taksama nie atrymałasia. Jak na toje, u hety čas ni sama žančyna nikomu nie telefanavała, ni joj nichto nie telefanavaŭ. Na zaprašeńnie pradstaŭnikoŭ pravaachoŭnych orhanaŭ i supracoŭnikaŭ padatkovaj inśpiekcyi pryjści i pierakanacca, što jany z dačkoj žyvuć pa srodkach, nichto nie adhuknuŭsia. A voś źjaŭleńnie ŭ sudzie staličnaha advakata, jaki ŭziaŭsia abaraniać intaresy žančyny, było ŭspryniata jak … dokaz materyjalnaha dabrabytu adkazčycy.

Tak, jana nie admaŭlaje, što ŭłasnaja bieskłapotnaść pryviała da takich nastupstvaŭ, ale zdavacca nie źbirajecca.

• 0
• 0
• 0
• 0
• 0
• 0
• 0
• 0