Antykryzisny fond JeŭrAzES rekamienduje Biełarusi jak chutčej pavysić košt płatnych pasłuh dla nasielnictva

Antykryzisny fond (AKF) JeŭrAzES, ź jakim Biełaruś abmiarkoŭvaje novuju kredytnuju prahramu, rekamienduje biełaruskim uładam jak maha chutčej pavyšać taryfy na žyllova-kamunalnyja i transpartnyja pasłuhi.

Rekamiendacyi AKF abnarodavanyja pavodle vynikaŭ vizitu ŭ Minsk misii fondu, jaki adbyŭsia 18—22 maja.

«Utrymańnie taryfaŭ na žyllova-kamunalnyja i transpartnyja pasłuhi dla nasielnictva na ŭzroŭni značna nižejšym za sabiekošt stvaraje dadatkovuju nahruzku na biudžet, praź jaki ažyćciaŭlajecca subsidavańnie ŭsiaho nasielnictva, niezaležna ad uzroŭniu dachodaŭ, i źnižaje kankurentazdolnaść realnaha siektara praź miechanizmy pierakryžavanaha subsidavańnia», — havorycca ŭ paviedamleńni Jeŭrazijskaha banka raźvićcia, jaki źjaŭlajecca kiraŭnikom srodkami AKF. 

Na dumku ekśpiertaŭ AKF, pierachod da akupnych taryfaŭ na płatnyja pasłuhi dla nasielnictva ŭ Biełarusi «pavinien prajści jak maha chutčej». «Heta źnimie ciažar pierakryžavanaha subsidavańnia z pradpryjemstvaŭ i biudžetnych arhanizacyj, skarocić raschody biudžetu na subsidavańnie hetych pasłuh i vyzvalić resursy na akazańnie metavaj adrasnaj abarony tych hrup nasielnictva, dachody jakich buduć najbolš uraźlivymi va ŭmovach praviadzieńnia libieralizacyi», — miarkujuć ekanamisty prajektnaj hrupy fondu. 

Aprača taho, AKF rekamienduje biełaruskim uładam skaracić abjom dyrektyŭnaha kredytavańnia ekanomiki.

«Abjom dziaržaŭnych prahram, jaki źjaŭlajecca fundamientalnaj pryčynaj niaŭstojlivych źniešnich dysbałansaŭ, dahetul zastajecca praźmiernym. Heta farmiruje vysokija devalvacyjnyja i inflacyjnyja čakańni, pryvodzić da ŭstojlivaha skaračeńnia vałavych mižnarodnych reziervaŭ i abciažarvaje pieraciok kapitału ŭ bolš pradukcyjnyja siektary», — miarkujuć u fondzie. 

Bolš istotnaje skaračeńnie dyrektyŭnaha kredytavańnia, u tym liku praz aptymizacyju dziejnaści Banka raźvićcia, «vyzvalić resursy dla bolš efiektyŭnych prajektaŭ, źnizić nacisk na płaciežny bałans i abmienny kurs i stanoŭča adabjecca na efiektyŭnaści bankaŭskaj sistemy», zaznačajuć ekanamisty AKF. 

Pavodle ich acenak, maštabnaje kredytavańnie ŭ miežach dziaržprahram padtrymlivaje zališniuju zaniataść i nizkuju efiektyŭnaść vykarystańnia vytvorčych mahutnaściaŭ dziaržaŭnych pradpryjemstvaŭ. «Pieraraźmierkavańnie pracy i kapitału ŭ najbolš efiektyŭnyja siektary va ŭmovach skaračeńnia dziaržprahram taksama vymahaje libieralizacyi cen i rynkaŭ, kamiercyjalizacyi dziaržaŭnych pradpryjemstvaŭ. <…> Pry hetym praktyka daviadzieńnia dyrektyŭnych pakazčykaŭ da ŭzroŭniu pradpryjemstvaŭ pavinna być poŭnaściu admienienaja», — padkreślivajuć ekśpierty AKF. 

Nahadajem, u sakaviku hetaha hoda Biełaruś nakiravała zajaŭku na atrymańnie novaha kredytu Antykryzisnaha fondu JeŭrAzES. Finansavańnie biełaruski bok choča atrymać na padtrymku stabilizacyjnaj prahramy ŭrada i Nacbanka na 2015—2017 hady. Zajaŭku Biełarusi saviet AKF płanuje razhledzieć da kanca pieršaha paŭhodździa.

• 0
• 0
• 0
• 0
• 0
• 0
• 0
• 0