Rost cen na srebra prymusiŭ papularnaha vytvorcu juvielirnych vyrabaŭ Pandora pierajści na płacinu
Kampanija Pandora, viadomaja svajoj kancepcyjaj «dastupnaj raskošy», vymušana źmianić technałohiju vytvorčaści znakamitych branzaletaŭ i padviesak, vykarystoŭvajučy płacinavaje pakryćcio zamiest čystaha srebra. Jak piša The New York Times, hety krok — sproba abaranić biznes nie tolki ad anamalnych cen na syravinu, ale i ad cisku vysokich mytnych pošlin dy ahulnaha źnižeńnia spažyvieckaha popytu.
Pandora — najbujniejšy juvielirny brend u śviecie pavodle abjomaŭ vytvorčaści — štohod zakuplaje bolš za 300 ton srebra, ale ciapier vymušana źmianiać stratehiju praz anamalny rost cen. Za apošni hod srebra padaražeła ŭdvaja, dasiahnuŭšy 80 dalaraŭ za ŭncyju, što stała značna bolš balučym udaram dla biznes-madeli kampanii, čym rost cen na zołata.
Kab zachavać status «dastupnaj raskošy», u pačatku lutaha brend zajaviŭ pra zapusk liniejki vyrabaŭ z płacinavym pakryćciom, jakaja pavinna źmienšyć zaležnaść ad darahoha sterlinhavaha srebra.
Vybar na karyść płaciny abumoŭleny jaje stabilnaściu: choć hety mietał kaštuje kala 2100 dalaraŭ za uncyju, z pačatku hoda jon padaražeŭ usiaho na 3%. Heta nieparaŭnalna z dvuchznačnym pracentnym rostam srebra za toj ža pieryjad.
Tamu ŭžo praz hod Pandora płanuje pieravieści na novuju technałohiju jak minimum pałovu svajoj srebranaj pradukcyi. Taki krok dazvolić kampanii «nivieliravać značnuju častku» vydatkaŭ na syravinu, vykarystoŭvajučy płacinavaje napyleńnie na bolš tannyja mietaličnyja spłavy.
Hienieralnaja dyrektarka Pandora Bierta de Pabłos-Barbjer, jakaja ŭznačaliła kampaniju ŭ pačatku hoda, pryznaje, što praźmiernaja zaležnaść ad adnaho vidu syraviny stała surjoznaj finansavaj ryzykaj. Pavodle jaje słoŭ, papiarednija vahańni cen na srebra zanadta mocna ŭpłyvali na prybytkovaść, tamu dyviersifikacyja materyjałaŭ nieabchodnaja dla stabilnaści biznesu ŭ budučyni.
Jak adznačaje NYT, hetaja rearhanizacyja adbyvajecca na fonie słabaj spažyvieckaj kanjunktury, asabliva ŭ ZŠA, dzie ŭ kancy minułaha hoda prodažy istotna zapavolilisia. Za minuły hod vyručka kampanii skłała 5,1 młrd dalaraŭ, pavialičyŭšysia tolki na 2% u supastaŭnych cenach, a voś ahulny prybytak faktyčna nie źmianiŭsia. Bolš za toje, prahnoz na biahučy hod praduhledžvaje amal nulavy rost prodažaŭ, što prymušaje kiraŭnictva šukać šlachi aptymizacyi vydatkaŭ.
Dadatkovym vyprabavańniem stała mytnaja palityka administracyi Donalda Trampa, bo Pandora vyrablaje svaje ŭpryhožvańni ŭ Tajłandzie, a amierykanski rynak źjaŭlajecca dla jaje klučavym. Uviadzieńnie 20‑pracentnych mytaŭ na impart z Tajłanda i Vjetnama, dzie kampanija jakraz rychtuje novyja vytvorčyja mahutnaści, stvaryła novyja finansavyja barjery i prymusiła inviestaraŭ bolš naściarožana stavicca da akcyj brenda.
Niahledziačy na ŭsie vykliki, kiraŭnictva Pandora supakojvaje pakupnikoŭ: jakaść vyrabaŭ navat palepšycca, bo płacinavaje pakryćcio bolš ustojlivaje da karozii i nie ciamnieje z časam. Heta dazvolić nasić upryhožvańni navat padčas adpačynku na mory, pry hetym hałoŭnaja meta kampanii zastajecca niaźmiennaj — zachavać ceńniki na zvykłym dla spažyŭcoŭ dastupnym uzroŭni.
«Vyšyty ručnik vylečvaŭ ludziej». Minčanka stvaraje ŭpryhažeńni pa matyvach biełaruskich arnamientaŭ
150 rubloŭ za karobku «Łui Viton»: jak biełarusy sprabujuć zarabić na prodažy ŭpakoŭki luksavych brendaŭ
Najbujniejšaja juvielirnaja kampanija admovicca ad naturalnych dyjamientaŭ i pačnie ich vyroščvać u łabaratoryi
Niaklajeŭ apublikavaŭ złabadzionny vierš. U im zhadvajecca i Kaleśnikava z Babarykam, i Cichanoŭskaja, i Prakopjeŭ z Paźniakom23
Kamientary