Tramp padpisaŭ ukaz ab pavyšeńni taryfaŭ dla krain, jakija handlujuć ź Iranam

Prezident ZŠA padpisaŭ ukaz, jaki dapuskaje pavyšeńnie stavak mytnych taryfaŭ na impart z krain, jakija praciahvajuć handlavać ź Iranam, piša Bi-bi-si.

U dakumiencie nie paznačana kankretnaja vieličynia pošliny, adnak apisvajecca pryncyp jaje prymianieńnia. U jakaści prykładu havorycca, što «pačynajučy z daty ŭstupleńnia ŭ siłu hetaha ŭkaza dadatkovaja staŭka — naprykład 25% — moža nakładacca na tavary, jakija impartujucca ŭ ZŠA i vyrableny ŭ luboj krainie, jakaja naŭprost ci ŭskosna zakuplaje, impartuje ci inšymi sposabami nabyvaje lubyja tavary ci pasłuhi ź Irana».

Hety ž uzrovień — 25% — Tramp zhadvaŭ u svaim paście na sajcie Truth Social 12 studzienia.

U ukazie adznačajecca, što «prezident uskładaje na Iran adkaznaść za imknieńnie nabyć jadziernyja mahčymaści, padtrymku teraryzmu, raspracoŭku balistyčnych rakiet i rehijanalnuju destabilizacyju, jakija stvarajuć pahrozu biaśpiecy, sajuźnikam i intaresam ZŠA».

Iran pakul nie kamientavaŭ novy krok Vašynhtona.

Hałoŭnym artykułam iranskaha ekspartu zastajecca syraja nafta.

Jak paviedamlała 12 studzienia ahienctva Reuters sa spasyłkaj na dadzienyja analityčnaj kampanii Kpler, kala 80% iranskich pastavak nakiroŭvajecca ŭ Kitaj. U kitajskaj mytnaj statystycy z 2022 hoda adsutničajuć pramyja pastaŭki nafty ź Irana, adnak analityki tłumačać heta tym, što syravina pierahružajecca ŭ trecich krainach i afarmlajecca jak małajzijskaja ci indaniezijskaja.

Sam Tramp naŭprost svoj ukaz nie kamientavaŭ, ale ŭ razmovie z žurnalistami ŭ samalocie paŭtaryŭ pazicyju ŭ dačynieńni da Tehierana: «Nijakaj jadziernaj zbroi».

U piatnicu ŭ Amanie prajšli pieramovy Irana i ZŠA, jakim papiaredničali niekalki tydniaŭ uzajemnych pahroz. Kiraŭnik iranskaj delehacyi, ministr zamiežnych spraŭ Abas Arahčy, nazvaŭ sustreču «dobrym pačatkam» i adznačyŭ «pazityŭnuju atmaśfieru». Tramp uviečary ŭ toj ža dzień skazaŭ, što pieramovy byli «vielmi dobryja». ZŠA pradstaŭlali śpiecyjalny pasłańnik Styŭ Uitkaf i ziać prezidenta Džared Kušnier.

Taksama Tramp padpisaŭ ukaz ab admienie dadatkovych taryfaŭ dla Indyi. U im napisana, što Indyja abaviazałasia spynić kuplać rasijskuju naftu

Prezident ZŠA Donald Tramp padpisaŭ ukaz, jaki admianiaje dadatkovy mytny taryf u 25% na impart ź Indyi, uviedzieny z-za taho, što Ńju-Deli z pačatku poŭnamaštabnaj vajny va Ukrainie kuplaŭ vialikija abjomy rasijskaj syroj nafty.

«Indyja abaviazałasia spynić naŭprost ci ŭskosna impartavać naftu z Rasijskaj Fiederacyi», — cytuje AFP tekst ukaza amierykanskaha prezidenta. U suviazi z hetym dadatkovaja pošlina pierastanie spahaniacca paśla apoŭnočy pa časie Uschodniaha ŭźbiarežža ZŠA.

Tramp upieršyniu abviaściŭ ab vyrašeńni svajoj handlovaj sprečki ź Indyjaj 3 lutaha paśla telefonnaj razmovy z premjer-ministram Narendraj Modzi. Jon zajaviŭ, što «recyprokny» taryf dla indyjskich tavaraŭ składzie 18% (da hetaha, navat biez štrafu za rasijskuju naftu, bazavy taryf dla Indyi składaŭ 25%, a ź im — usie 50%). Padpisany ŭ piatnicu ŭkaz farmalizuje hetyja paramietry.

Indyja paćvierdziła fakt damoŭlenaści z ZŠA, ale da hetaha času aficyjna nie rabiła nijakich zajaŭ ab spynieńni impartu nafty z Rasii.

Ministr handlu Pijuš Hojał vystupiŭ u parłamiencie ŭ čaćvier, ale ŭ jaho zajavie tolki adznačałasia, što pryjarytetam urada źjaŭlajecca zabieśpiačeńnie enierhietyčnych patreb indyjcaŭ, i ŭ suviazi z hetym realizujecca stratehija, zasnavanaja na «dyviersifikacyi krynic enierhii». Ab admovie ad impartu ź jakoj-niebudź krainy jon nie zhadvaŭ.

Indyjski impart nafty z Rasii da poŭnamaštabnaha ŭvarvańnia va Ukrainu byŭ blizki da nula, ale z 2022 hoda pačaŭ chutka raści. Adnak, pa danych Reuters, pik pastavak byŭ projdzieny ŭ červieni minułaha hoda, i z tych časoŭ jany niaŭchilna źnižalisia.

• 0
• 0
• 0
• 0
• 0
• 0
• 0
• 0