U Dziatłavie ad udaru tokam zahinuŭ budaŭnik, na rukach u žonki zastaŭsia małaletni syn

Zdareńnie adbyłosia 27 maja. Kala 16.00 Dźmitryj Pienda atrymaŭ udar tokam, ad jakoha adrazu zahinuŭ.

Dźmitryj 27 maja pracavaŭ z bryhadaj u budynku chlebazavoda Dziatłaŭskaj filii Hrodzienskaha abłspažyŭtavarystva: špaklavali i tynkavali ścieny. U kacielni jon uziaŭsia špatelem niešta papravić na ścianie pad stollu. A tam tyrčali pravady. Jany akazalisia nie izalavanyja i pad napružańniem.

Kali mužčynu ŭdaryła tokam, to pryciahnuła da ściany i nie adpuskała. Adzin z rabotnikaŭ kinuŭsia Dźmitryja adciahnuć, ale sam nie zdoleŭ heta zrabić — tolki z dapamohaj naparnika. Miedyki reanimavać jaho nie zmahli.

Udava Volha kaža, što jašče niama zaklučeńnia sudova-miedycynskaj ekśpiertyzy. Ale ŭ paśviedčańni ab śmierci paznačana, što muž pamior u suviazi z paškodžańniem elektryčnym tokam.

«Prosta tak ad dotyku da pravadoŭ nichto nie hinie», — kaža ŭdava. Jana baicca, što mohuć prosta schavać fakt, što muž zahinuŭ na vytvorčaści.

«Abvinavacić Dźmitryja i paviesić na jaho jahonuju ž śmierć ja nie dazvolu», — adznačaje Volha. Jana maje namier dabivacca zaviadzieńnia kryminalnaj spravy. «Ale bajusia, što spravu śpišuć na niaščasny vypadak. Tam pracujuć inšyja ludzi i jany buduć u niebiaśpiecy. Ja nie chaču, kab padobny vypadak paŭtaryŭsia».

Administracyja chlebazavoda, dzie Źmicier zahinuŭ, tak i nie pryniesła siamji spačuvańniaŭ.

Dźmitryju było 32 hady. U jaho zastaŭsia syn Zachar, jakomu tolki 2 hady i 5 miesiacaŭ.

«Raźbirajecca Śledčy kamitet. Ale pytańnie pakul adkrytaje, chto tam vinavaty. Jon — majstar, a palez rabić tynkoŭku. Heta ž razbor idzie. Nie viedaju, što vam tłumačyć», — skazała namieśnica dyrektara Dziatłaŭskaha rajSTA Valancina Baravik.

Miž inšym, viasnoj Dziatłaŭski chlebazavod užo traplaŭ u chroniki zdareńniaŭ. 31 sakavika tam častkova abvaliłasia stol. Tady nichto nie paciarpieŭ, ale daviałosia spynić pracu cecha. Baravik skazała, što ciapier bryhada nie ŭ tym cechu zajmałasia ramontam.

«Dziatłaŭskim rajonnym adździełam Śledčaha kamiteta pravodzicca daśledčaja pravierka pa fakcie śmierci žychara Dziatłaŭskaha rajona 1982 hoda naradžeńnia. Pravodziacca nieabchodnyja śledčyja dziejańni, pryznačana sudova-miedycynskaja ekśpiertyza. Ustanaŭlivajucca pryčyny, u vyniku jakich nastupiła śmierć», — paviedamiŭ pradstaŭnik Śledčaha kamiteta Alaksiej Klimovič.

• 0
• 0
• 0
• 0
• 0
• 0
• 0
• 0