Rakieta SpaceX upieršyniu ŭzarvałasia ŭ kamiercyjnym rejsie. Ełan Mask: «Pryčyna niełahičnaja»
Nichto nie paciarpieŭ, kasmanaŭty bieź ježy nie zastanucca.
Videa avaryi ad NASA:
U niadzielu, 28 červienia, rakieta-nośbit Falcon 9 z hruzavym karablom Dragon (abodva — pryvatnaj kampanii SpaceX) uzarvałasia praz 2 chviliny 19 siekund paśla zapusku na mysie Kanavierał.
Jak raspavioŭ zasnavalnik SpaceX Ełan Mask, pryčynaj avaryi staŭ padvyšany cisk u baku z vadkim kisłarodam. «Źviestki pakazvajuć niełahičnuju (counterintuitive) pryčynu», — napisaŭ jon u tvitary.
Hruzavik Dragon mieŭ dastavić na MKS dźvie tony hruzu. Prahramu pracy astranaŭtaŭ pryjdziecca skarektavać u adsutnaści dadatkovaha charčavańnia i abstalavańnia (u tym liku novaha skafandra i stykovačnaha vuzła, a taksama vaśmi spadarožnikaŭ na bazie CubeSat).
Ekipaž MKS adreahavaŭ na stratu spakojna. «Kosmas — štuka niaprostaja», — napisaŭ u tvitary astranaŭt Skot Kieli, jaki naziraŭ za zapuskam z borta MKS. Ježy na stancyi chopić jašče na niekalki miesiacaŭ, vada i kisłarod vyrablajucca prosta na stancyi. Raźličvajecca, što 3 lipienia da stancyi palacić rasijski hruzavik «Prahres M-28M». «Raskosmas» prapanavaŭ amierykancam dastavić luby nieabchodny hruz — NASA zajaviła, što ŭ hetym niama nieabchodnaści.
Na siońnia Dragon jość adzinym karablom, zdolnym nie tolki dastaŭlać, ale i viartać hruzy z MKS. Katastrofa Falcon 9 — pieršaja ŭ historyi kamiercyjnych (nie testavych) zapuskaŭ SpaceX. Papiarednija 18 kamiercyjnych zapuskaŭ prajšli paśpiachova. Avaryja nie musić adbicca na supracy NASA i SpaceX — Dragon pa kantrakcie maje palacieć da MKS jašče prynamsi vosiem raz da 2017 hoda.
Ciapier čytajuć
«My nie viedali Siarhieja Cichanoŭskaha da siońniašniaj pres-kanfierencyi»12
Kamientary