Mierkavańnie: Ludzi nie navučacca ekanomić, pakul nie pačnuć całkam apłačvać zatraty na elektraenierhiju

Nasielnictva nie budzie ekanomić ciepłavuju i elektraenierhiju, pakul nie budzie poŭnaściu apłačvać zatraty na hetyja pasłuhi. Takoje mierkavańnie vykazaŭ načalnik adździeła arhanizacyjna-pravavoj pracy i ŭzajemadziejańnia ź ŚMI departamienta pa enierhaefiektyŭnaści Dziaržstandarta Vital Krecki 9 lipienia na kruhłym stale ŭ Minsku. 

«Kali nasielnictva budzie pakryvać sabiekošt ci płacić bolš za jaho, jano budzie samo zacikaŭlenaje ŭ ekanomii, ukaraniać u siabie niejkija inavacyi, źmianiać lampački na śviatłodyjodnyja i h.d.», — adznačyŭ jon. 

Pavodle słoŭ Kreckaha, u 2014 hodzie nasielnictva niedapłaciła da pakryćcia sabiekoštu ciepła- i elektraenierhii 690 młn. dołaraŭ. U pryvatnaści 580 młn. dołaraŭ niedapłačana za ciepłavuju enierhiju. U cełym biełarusy pakryli tolki 22,3% sabiekoštu ciepłaenierhii, siaredniehadavy taryf dla nasielnictva skłaŭ — 8,97 dołara/Hkał, zatraty — 40,28 dołara/Hkał. 

Za elektraenierhiju nasielnictva letaś niedapłaciła 110 młn. dołaraŭ, siaredniehadavy taryf skłaŭ 7,9 centa za kVt•hadz, zatraty — 9,43 centa/kVt•hadz. Takim čynam, nasielnictva kampiensavała 83,7% zatrat na vytvorčaść elektraenierhii, raskazaŭ śpiecyjalist. 

U toj ža čas, adznačyŭ jon, hetyja ličby raźličanyja pry ŭmovie kursu dołara 1 da 10 tys. rubloŭ, i paśla devalvacyi biełaruskaj valuty dola pakryćcia zatrat niekalki źniziłasia. 

Na dumku kiraŭnika prahramy pa enierhaefiektyŭnaści Centra ekałahičnych rašeńniaŭ Dźmitryja Buronkina, dziaržavie pavinna być bolš vyhadna, kab nasielnictva ekanomiła ciepła- i elektraenierhiju, čym samomu nasielnictvu, pakolki jano apłačvaje bolšuju častku raschodaŭ. «U nasielnictva patencyjał vielmi vialiki, tamu što pradpryjemstvy svoj patencyjał realizujuć i tak, tamu što płaciać pa vysokich taryfach. A voś ludzi svoj patencyjał nie realizujuć praktyčna nijak, tamu što, pa-pieršaje, sensu niama z-za pierakryžavanaha subsidavańnia, pa-druhoje, niama prosta stymułaŭ praktyčna nijakich», — skazaŭ jon. 

Śpiecyjalist ličyć, što taryf na ciepła- i elektraenierhiju nie pavinien być miechanizmam subsidyj. «Taryf — heta elemient rynku, i jon pavinien adpaviadać koštu pasłuhi. Kali dziaržava choča kahości subsidavać, to ŭžo ŭklučajucca miechanizmy subsidyi», — zaznačyŭ jon. 

Jak raskazaŭ pradstaŭnik CER, zvyčajna samyja biednyja ludzi, na jakich bolš niehatyŭna adbivajecca pavyšeńnie taryfaŭ, na samaj spravie spažyvajuć ciepła- ci elektraenierhii mienš za ŭsich, u toj čas jak bahatyja słai nasielnictva, dla jakich pavyšeńnie taryfaŭ nie ŭjaŭlaje prablemy, i spažyvajuć bolš za ŭsich. Jak miarkuje Buronkin, u hetaj situacyi praściej vybudavać sistemu, «kali za košt bahatych, jakija buduć płacić bolš, buduć subsidavacca tyja biednyja, jakim nie chapaje hrošaj».

• 0
• 0
• 0
• 0
• 0
• 0
• 0
• 0