Uładzimir Niaklajeŭ kandydatam: «Pakińcie kiraŭnika krainy tancavać kazačyja tancy!»
Kaardynacyjny kamitet inicyjatyŭnaj hrupy pa vyłučeńni ŭ prezidenty Mikałaja Statkieviča pravioŭ 28 lipienia pres-kanfierencyju pa vynikach pieršaha etapu kampanii.
Pierad pačatkam žonku palitviaźnia Marynu Adamovič pavinšavali z dniom naradžeńnia, jaki prypaŭ na hety dzień. Pradstaŭniki Ruchu Salidarnaści «Razam!» pažadali joj, kab Mikałaj usio ž staŭ prezidentam.
Maryna Adamovič nahadała, što Viarchoŭny sud nie pryniaŭ da razhladu skarhu na admovu ŭ rehistracyi CVK inicyjatyŭnaj hrupy Statkieviča. Heta źjaŭlajecca parušeńniem pravoŭ 1700 hramadzianaŭ Biełarusi, jakija ŭvajšli ŭ skład hrupy, padkreśliła Adamovič. Darečy, ŭ hetuju hrupu ŭvajšli try sioletnija kandydaty ŭ prezidenty: Anatol Labiedźka, Taćciana Karatkievič i Viktar Ciareščanka («Ciareščanka paŭsiul», — zmročna pažartavaŭ Niaklajeŭ).
«Ułady zrabili ŭsio, kab nie dapuścić nas da ŭdziełu ŭ ahitacyjnaj kampanii. Ale my nastojvajem i budziem nastojvać na vyzvaleńni ŭsich palitviaźniaŭ, — skazała Maryna Adamovič. — Biez hetaha nie moža być nijakich spraviadlivych vybaraŭ».
Jana paviedamiła, što inicyjatyŭnaja hrupa ŭ hetkaj ci inšaj formie praciahnie svaju dziejnaść pa reabilitacyi palityčnych źniavolenych.
«I ja ŭpeŭnienaja, što biełarusy jašče ździviać sami siabie. I farmiravańnie hetaj inicyjatyŭnaj hrupy — vielmi mocny krok, i ja ŭdziačnaja ludziam, jakija nie pabajalisia pastavić svaje podpisy», — skazała Adamovič. Zatym jana začytała zajavu Statkieviča, ŭ jakoj jon taksama padziakavaŭ tym, chto ŭvajšoŭ u inicyjatyŭnuju hrupu. Taksama ŭ svajoj zajavie palitviazień zaklikaŭ usich, chto pryjdzie hałasavać, «zrabić svoj dopis u biuleteni dla hałasavańnia, jaki b vyrazna śviedčyŭ ab nieprymańni palityki praviačaha režyma».
Uładzimir Niaklajeŭ u čarhovy raz zaklikaŭ usich sioletnich kandydataŭ źniacca i «pakinuć dziejnaha kiraŭnika krainy tancavać kazačyja tancy».
«Kapitulacyja demakratyčnaj apazicyi i padyhryvańnie Jeŭropy aŭtamatyčna pieradajuć nas u samyja ciesnyja abdymki Rasii», — skazaŭ jon.
«Spadziavańni na demakratyčnuju zachodniuju supolnaść u mianie nie stračanyja. Vyzvaleńnie palitviaźniaŭ pavinna być hałoŭnaj umovaj prysutnaści na vybarach mižnarodnych naziralnikaŭ. Jość palitviaźni — niama čaho siudy jechać hladzieć, i adtul vidać, što jany jość», — zajaviŭ Niaklajeŭ.
Ciapier čytajuć
U centry Minska tajamniča źnikła dačka dyrektara bujnoha ahrakompleksu8
Kamientary