Jak raspaviała BiełaPAN śviedka incydentu — dziaŭčyna, jakaja paprasiła jaje nie nazyvać, kancert pank-rok-hurtoŭ adbyvaŭsia u lesie ŭ rajonie čyhunačnaj stancyi Zialonaje, kudy źjechałasia kala vaśmidziesiaci maładych ludziej. Jany raźviali vohnišča, niekatoryja raźbili namioty.
Kancert pačaŭsia prykładna ŭ 20.00, a praź dźvie hadziny jaho pierapynili supracoŭniki milicyi, jakija źjavilisia niečakana. Pavodle dziaŭčyny, heta byli supracoŭniki AMAP i ludzi ŭ cyvilnym — usiaho kala tryccaci čałaviek.
«Jany ničoha nie tłumačyli i nie patrabavali, prosta nalacieli i pačali valić chłopcaŭ na ziamlu tvaram uniz, dziaŭčat nie čapali», — raspaviała surazmoŭca.
Hetak ža, biez tłumačeńnia pryčyn, ich pratrymali kala paŭtary hadziny u lesie, a potym zaviali ŭ aŭtazak.
Tych, chto pryjechaŭ na kancert na svaim transparcie, adpuścili, papiarednie aštrafavaŭšy za parkoŭku ŭ nienaležnym miescy.
Astatnich, prykładna 40—50 čałaviek, pryvieźli ŭ Ždanovicki adździeł milicyi UUS Minskaha rajvykankama, raźmieščany ŭ pasiołku Ratamka, i stali praviarać dakumienty.
Niekatorych adpuskali adrazu, na inšych składali pratakoły pa artykule «drobnaje chulihanstva» Kodeksa ab administracyjnych pravaparušeńniach.
U dačynieńni da surazmoŭcy BiełaPAN taksama skłali pratakoł — jana abvinavačvajecca ŭ niecenzurnaj łajancy. Dziaŭčynu pahražali adpravić u izalatar časovaha ŭtrymańnia, ale ŭ vyniku adpuścili, papiarednie uziaŭšy padpisku, zhodna ź jakoj jana abaviazanaja źjavicca pa poźvie ŭ sud. Data suda nieviadomaja.
Ciapier, pa słovach dziaŭčyny, u milicyi zastajucca piaciora zatrymanych. Jany abvinavačvajucca pa troch artykułach: udzieł u niesankcyjanavanym mierapryjemstvie, znachodžańnie ŭ niećviarozym stanie i supraciŭ pravaachoŭnym orhanam.
Sud nad imi pavinien adbycca ŭ paniadziełak, 3 žniŭnia.
Žorstkija dziejańni supracoŭnikaŭ milicyi surazmoŭca BiełaPAN źviazvaje z tym, što ŭłady aścierahajucca lubych niefarmalnych schodaŭ, u tym liku kancertaŭ, na jakich źbirajecca moładź.
Što zapisana aficyjnaj pryčynaj śmierci adzinaha syna Jarmošynaj?7
Kamientary