Statkievič 10 vieraśnia praviadzie pikiet u centry Minska z patrabavańniem svabodnych vybaraŭ
«10 vieraśnia, — zajaviŭ Mikałaj Statkievič u intervju Radyjo Svaboda, — u 18 hadzinaŭ ja budu pravodzić pikiet kala HUMa z nahody pačatku ahitacyjnaj kampanii. Pikiet z patrabavańniem narmalnych svabodnych vybaraŭ. Zaprašaju da ŭdziełu ŭ hetym pikiecie ŭsich, chto padtrymoŭvaje pazicyju, anałahičnuju majoj. Prychodźcie z acenkami hetych kštałtu kandydataŭ, z płakatami ci bieź ich.
Kali Łukašenka sapraŭdy choča hetaj lehitymnaści, to chaj nie zaminaje nam realizoŭvać naša kanstytucyjnaje prava na volny i mirny schod. Kali buduć chapać, vincić, sadžać — chaj raźvitajecca sa svajoj lehitymnaściu. Ja zaprašaju na hetaje mierapryjemstva pradstaŭnikoŭ doŭhaterminovaj misii naziralnikaŭ ABSE. Pahladzim, što budzie dalej».
28 žniŭnia na supolnaj pres-kanferencyi pradstaŭnikoŭ apazicyi Mikałaj Statkievič zajaviŭ, što «vybary ŭžo sfalsifikavanyja». Pra svaje dalejšyja kroki i staŭleńnie da prezidenckaj kampanii 2015 hodu Statkievič raspavioŭ Radyjo Svaboda:
«Na svajoj pres-kanfierencyi my nazvali našu hałoŭnuju metu, za jakuju my budziem zmahacca ŭ bolš šyrokich časavych ramkach, čym hetaja prezidenckaja kampanija. Heta ŭsieahulnyja demakratyčnyja vybary z udziełam narmalnych kandydataŭ. Ciapier nam prapanujucca psieŭdavybary, u jakich nibyta ŭdzielničajuć čałaviek, jakoha ja liču złačyncam, i jaho fiktyŭnyja kankurenty. Vybirać niama z kaho. Vybary my prajhrali, ich užo niama».
Statkievič zajaŭlaje, što razam z paplečnikami źbirajecca skarystać mahčymaści, jakija daje ahitacyjny pieryjad, kab «dasiahnuć volnych demakratyčnych vybaraŭ z vykarystańniem mechanizmaŭ vybarčaj kampanii i mahčymaściej, jakija daje Vybarčy kodeks».
«Hałoŭnaja z metaŭ — heta praca z hramadstvam, kab jano viedała, što vybary niesapraŭdnyja. Pa sutnaści — delehitymizacyja vybaraŭ u vačach hramadstva, kab ludzi viedali, što prezident niesapraŭdny i treba narmalnyja vybary, — kaža Mikałaj Statkievič. — Nastupnaje — heta delehitymizacyja ŭ vačach mižnarodnaj supolnaści. Kab my ŭ našaj dalejšaj baraćbie za volnyja vybary mahli spadziavacca na ichnuju padtrymku i kab nie zdaryłasia takoj skrajniaj situacyi, kali nibyta mižnarodny lehitymny prezident zdaje našu niezaležnaść Rasii za niaŭkrutki ŭ ekanomicy».
Udava aktyvista Maksima Čarniaŭskaha raskazała pra jaho pakuty pierad suicydam5
Kamientary