Статкевіч 10 верасня правядзе пікет у цэнтры Мінска з патрабаваннем свабодных выбараў
«10 верасня, — заявіў Мікалай Статкевіч у інтэрв'ю Радыё Свабода, — у 18 гадзінаў я буду праводзіць пікет каля ГУМа з нагоды пачатку агітацыйнай кампаніі. Пікет з патрабаваннем нармальных свабодных выбараў. Запрашаю да ўдзелу ў гэтым пікеце ўсіх, хто падтрымоўвае пазіцыю, аналагічную маёй. Прыходзьце з ацэнкамі гэтых кшталту кандыдатаў, з плакатамі ці без іх.
Калі Лукашэнка сапраўды хоча гэтай легітымнасці, то хай не замінае нам рэалізоўваць наша канстытуцыйнае права на вольны і мірны сход. Калі будуць хапаць, вінціць, саджаць — хай развітаецца са сваёй легітымнасцю. Я запрашаю на гэтае мерапрыемства прадстаўнікоў доўгатэрміновай місіі назіральнікаў АБСЭ. Паглядзім, што будзе далей».
28 жніўня на супольнай прэс-канфэрэнцыі прадстаўнікоў апазіцыі Мікалай Статкевіч заявіў, што «выбары ўжо сфальсіфікаваныя». Пра свае далейшыя крокі і стаўленне да прэзідэнцкай кампаніі 2015 году Статкевіч распавёў Радыё Свабода:
«На сваёй прэс-канферэнцыі мы назвалі нашу галоўную мэту, за якую мы будзем змагацца ў больш шырокіх часавых рамках, чым гэтая прэзідэнцкая кампанія. Гэта ўсеагульныя дэмакратычныя выбары з удзелам нармальных кандыдатаў. Цяпер нам прапануюцца псеўдавыбары, у якіх нібыта ўдзельнічаюць чалавек, якога я лічу злачынцам, і яго фіктыўныя канкурэнты. Выбіраць няма з каго. Выбары мы прайгралі, іх ужо няма».
Статкевіч заяўляе, што разам з паплечнікамі збіраецца скарыстаць магчымасці, якія дае агітацыйны перыяд, каб «дасягнуць вольных дэмакратычных выбараў з выкарыстаннем мэханізмаў выбарчай кампаніі і магчымасцей, якія дае Выбарчы кодэкс».
«Галоўная з мэтаў — гэта праца з грамадствам, каб яно ведала, што выбары несапраўдныя. Па сутнасці — дэлегітымізацыя выбараў у вачах грамадства, каб людзі ведалі, што прэзідэнт несапраўдны і трэба нармальныя выбары, — кажа Мікалай Статкевіч. — Наступнае — гэта дэлегітымізацыя ў вачах міжнароднай супольнасці. Каб мы ў нашай далейшай барацьбе за вольныя выбары маглі спадзявацца на іхную падтрымку і каб не здарылася такой скрайняй сітуацыі, калі нібыта міжнародны легітымны прэзідэнт здае нашу незалежнасць Расіі за няўкруткі ў эканоміцы».
Цяпер чытаюць
Мабільны Анжалікі Мельнікавай з 19 сакавіка знаходзіцца на тэрыторыі Беларусі28
Каментары