U 630‑staronkavy zbornik uklučany najlepšyja vieršy i bajki Krapivy, jaho kamedyi, apaviadańni, niaskončany sacyjalna‑bytavy raman «Miadźviedzičy», a taksama publicystyčnyja i litaraturaznaŭčyja artykuły.
U Miensku ŭ seryi «Biełaruski knihazbor» vyjšaŭ zbornik vybranych tvoraŭ narodnaha piśmieńnika Biełarusi Kandrata Krapivy (Kandrat Kandratavič Atrachovič, 05.03.1896, vioska Nizok Uździenskaha rajonu Mienskaj vobłaści — 07.01.1991).
Jak paviedamiŭ BiełaPAN staršynia mižnarodnaha hramadskaha abjadnańnia «Biełaruski knihazbor» i hałoŭny redaktar seryi, piśmieńnik, kandydat histaryčnych navuk Kastuś Ćvirka, u 630‑staronkavy zbornik uklučany najlepšyja vieršy i bajki Krapivy, jaho kamedyi «Chto śmiajecca apošnim», «Miły čałaviek» i «Brama nieŭmiručaści», apaviadańni, niaskončany sacyjalna‑bytavy raman «Miadźviedzičy», a taksama publicystyčnyja i litaraturaznaŭčyja artykuły. Akramia taho, u knižku ŭvajšoŭ blok fotazdymkaŭ i listy da dziejačaŭ kultury, u tym liku da Michasia Łyńkova, Leanida Rachlenki, Ilji Hurskaha, Alesia Machnača i Visaryjona Harbuka. Układalnikam toma, aŭtaram pradmovy i kamentara źjaŭlajecca piśmieńnik, kandydat histaryčnych navuk Sierafim Andrajuk.
Knihu nakładam 2 tys. asobnikaŭ vypuściła staličnaje vydaviectva «Biełaruskaja navuka». Prykładny košt zbornika — 30 tys. rubloŭ.
U nabližejšych planach redakcyi seryi — vydańnie vybranych tvoraŭ narodnaha paeta Biełarusi Ryhora Baradulina, hramadska‑palityčnaha dziejača, vydaŭca, historyka, publicysta, litaraturaznaŭca i katalickaha śviatara Adama Stankieviča, a taksama zbornika biełaruskich varyjantaŭ eŭrapiejskich vandroŭnych siužetaŭ «Histaryčny i rycarski raman».
Usiaho za 12 hadoŭ vydadziena 42 knihi seryi, jakaja pavinna skłaści 200 tamoŭ.
Kamientary