Prymusovaja padpiska ŭ škołach: pakul baćki nie zajaviać adkryta, prablema zastaniecca
Usio čaściej u Biełarusi hučać skarhi na toje, što škoły abaviazvajuć za hrošy baćkoŭ padpisacca na «Nastaŭnickuju hazietu», «Viasiołku», «Zoŕku», «Junyj spasatiel». Dniami list z hetkaj skarhaj atrymała i HA «Biełaruskaja asacyjacyja žurnalistaŭ».
Pavodle aŭtarki lista, na baćkoŭskich schodach nastaŭniki vielmi prosiać zdać hrošy, kab «padpisać» škołu na vyšejnazvanyja vydańni.
– Kali baćki admaŭlajucca, nastaŭnikam davodzicca zakładvać ułasnyja hrošy, kab nie iści na kanflikt z administracyjaj. U mai hetaha hoda, naprykład, z kožnaj siamji na baćkoŭskim schodzie prasili pa 15-20 tysiač biełaruskich rubloŭ na padpisku.
Niekatoryja nastaŭniki spasyłajucca na dakumient Ministerstva adukacyi, pavodle jakoha kožnaja škoła abaviazanaja padpisacca na peŭnuju kolkaść asobnikaŭ peŭnaha vydańnia. Nijakija adhavorki na toje, što baćki suprać albo što dzieciam nie padabajecca vydańnie, nie ŭličvajucca, – skardzicca aŭtarka lista.
Pa tłumačeńni pres-słužba HA «BAŽ» źviarnułasia da namieśnika staršyni Kamiteta pa adukacyi Minharvykankama Vitala Pryhodziča.
10 vieraśnia ŭ čynoŭnika, jaki kuryruje ideałahičnuju pracu ŭ staličnych ustanovach adukacyi, akurat vydaŭsia pryjomny dzień.
Jak i možna było pradkazać, čynoŭnik kateharyčna adprečyŭ infarmacyju pra prymusovuju padpisku. Vital Pryhodzič paviedamiŭ, što, kali ŭ kahości ŭźnikajuć padobnyja skarhi, treba najpierš sabrać dokazy, a potym źviartacca pa raźbiralnictva.
– Infarmacyja pra prymusovuju padpisku źjaŭlajecca ŭ biełaruskich ŚMI davoli časta, što, biezumoŭna, śviedčyć pra najaŭnaść prablemy. Ale ž nichto nikoli nie budzie źbirać dokazy suprać škoły, dzie vučacca tvaje ŭłasnyja dzieci. Choć, mahčyma, adzin-dva padobnych precedenty mahli b padšturchnuć prablemu da vyrašeńnia, – kamientuje situacyju staršynia HA «Biełaruskaja asacyjacyja žurnalistaŭ» Andrej Bastuniec. Pakul ža hetaha nie adbudziecca, jurydyčna paŭpłyvać na prablemu prymusovaj padpiski nie ŭjaŭlajecca mahčymym.
Kamientary