Pažar u etnahrafičnaj vioscy ŭ Zialonym Hai Mahilova zdaryŭsia viečaram 23 vieraśnia. Paciarpiełych niama.
Jak paviedamiła staršy inśpiektar Centra prapahandy i ŭzajemadziejańnia z hramadskaściu Mahiloŭskaha abłasnoha ŭpraŭleńnia MNS Volha Niecharošych, pra pažar u etnahrafičnaj vioscy paviedamiła prachožaja. «Hareli draŭlanyja adnapaviarchovyja budynki, što na terytoryi etnahrafičnaha kompleksu. Z ahniom zmahalisia piać pažarnych raźlikaŭ. Praz 10 chvilin połymia było ŭtajmavana, ale straty ad pažaru značnyja. Źniščany dachi dvuch damoŭ, dach i pierakryćcie terasy», — skazała inśpiektar.
Etnahrafičnaja vioska była pabudavana z aŭtentyčnaha dreva, zruby ź jakoha byli śpiecyjalna pieraviezienyja ŭ Mahiloŭ. Kompleks źjaŭlajecca miescam pracy ramieśnikaŭ i adpačynku naviedvalnikaŭ. Nijakich mierapryjemstvaŭ na momant uźniknieńnia pažaru nie pravodziłasia, adznačyła pradstaŭnik MNS, paviedamiŭšy, što pryčyna pažaru pakul nie ŭstanoŭlena.
Na terytoryi etnahrafičnaj vioski ŭ kastryčniku 2014 hoda ŭpieršyniu prajšło haradskoje śviata «Dranik-fest». Sioleta jaho arhanizatar, Centr haradskich inicyjatyŭ, płanavaŭ pravieści anałahičnaje mierapryjemstva druhi raz. Pažar adbiŭsia na terminach, ale śviata abaviazkova adbudziecca, zajaviła pradstaŭnik centra Alena Barysava.
«Ciapier tam idzie śledstva, tamu my havorym ab tym, što prosta pieranosim terminy. Pravodzić budziem tam ža, u hetaj vioscy. Mahčyma, my navat dapamožam jaje niejak adnavić, subotnik praviadziom. Dumaju, što nie paźniej za 17-18 kastryčnika», — skazała Barysava.
Ciapier čytajuć
«Ja byŭ u takoj dupie, ale pahladzicie na mianie». Staŭki daviali biełarusa da dna — jon raskazvaje, jak vybraŭsia nazad2
Kamientary