U dzień vybaraŭ prezidenta Biełarusi vybarščykam Centralnaha rajona Minska, jakija naviedajuć učastki dla hałasavańnia, abiacajuć zabaŭlalnyja prahramy, biaspłatny čaj, dehustacyju i rasprodaž pradukcyi.
Heta vynikaje z ulotak, jakija žychary Centralnaha rajona Minska znachodziać u svaich paštovych skryniach.
U pryvatnaści, paviedamlajecca, što 11 kastryčnika z 8.00 da 20.00 na ŭčastkach dla hałasavańnia vybarščykaŭ «čakaje śviatočnaja, ciopłaja atmaśfiera». «Padrychtavanaja cikavaja prahrama z udziełam tvorčych kalektyvaŭ i salistaŭ biełaruskaj estrady. Projduć kulturna-zabaŭlalnyja mierapryjemstvy, konkursy, viktaryny. Dla amataraŭ aktyŭnaha ładu žyćcia arhanizatary padrychtavali viasiołyja spartyŭnyja spabornictvy», — havorycca va ŭlotcy.
Vybarščykam abiacajuć vystavu dekaratyŭna-prykładnaj tvorčaści i majstar-kłasy. Kožny soty vybarščyk atrymaje kvitok na adno z kulturnych mierapryjemstvaŭ na terytoryi Centralnaha rajona.
«Budzie arhanizavanaja praca vyjaznych bufietaŭ, dzie vas čakaje šmat siurpryzaŭ, a mienavita: kožnamu, chto hałasuje ŭpieršyniu — padarunak, pieršamu pakupniku — bonusy i padarunki, siurpryzy dzieciam», — havorycca va ŭlotcy.
Apublikavany pahadzinny hrafik dehustacyi pradukcyi ajčynnych vytvorcaŭ i straŭ nacyjanalnaj kuchni, zhodna ź jakim vybarščyki zmohuć pasprabavać kandytarskija vyraby, miasnyja pradukty i syry, napoi i soki. Na kožnuju z dehustacyj adviedziena pa dźvie hadziny.
Vybarščykam taksama buduć prapanoŭvać biaspłatnuju harbatu, tavary i pradukty pa źnižanych cenach. Abiacany pašyrany prodaž płodaaharodninnaj pradukcyi, pašyrany rasprodaž chlebabułačnych i kandytarskich vyrabaŭ, pašyranaja vystava-prodaž litaraturnych navinak i drukavanych vydańniaŭ.
«Šmat kamu z Vas vypadzie šaniec atrymać u padarunak bonusnuju kartu sietki kram «Susiedzi» i pastajanna dziejučuju dyskontnuju kartu na źnižku 8% na ŭsie tavary ŭ univiermahu «Handlovy dom «Na Niamizie», — havorycca va ŭlotcy.
Tym, chto pryjdzie hałasavać ŭsioj siamjoj, abiacajuć «fota na pamiać».
«Pryjdzi i zrabi SVOJ VYBAR!» — zaklikaje ŭlotka.
Kamientary