У дзень выбараў прэзідэнта Беларусі выбаршчыкам Цэнтральнага раёна Мінска, якія наведаюць участкі для галасавання, абяцаюць забаўляльныя праграмы, бясплатны чай, дэгустацыю і распродаж прадукцыі.
Гэта вынікае з улётак, якія жыхары Цэнтральнага раёна Мінска знаходзяць у сваіх паштовых скрынях.
У прыватнасці, паведамляецца, што 11 кастрычніка з 8.00 да 20.00 на ўчастках для галасавання выбаршчыкаў «чакае святочная, цёплая атмасфера». «Падрыхтаваная цікавая праграма з удзелам творчых калектываў і салістаў беларускай эстрады. Пройдуць культурна-забаўляльныя мерапрыемствы, конкурсы, віктарыны. Для аматараў актыўнага ладу жыцця арганізатары падрыхтавалі вясёлыя спартыўныя спаборніцтвы», — гаворыцца ва ўлётцы.
Выбаршчыкам абяцаюць выставу дэкаратыўна-прыкладнай творчасці і майстар-класы. Кожны соты выбаршчык атрымае квіток на адно з культурных мерапрыемстваў на тэрыторыі Цэнтральнага раёна.
«Будзе арганізаваная праца выязных буфетаў, дзе вас чакае шмат сюрпрызаў, а менавіта: кожнаму, хто галасуе ўпершыню — падарунак, першаму пакупніку — бонусы і падарункі, сюрпрызы дзецям», — гаворыцца ва ўлётцы.
Апублікаваны пагадзінны графік дэгустацыі прадукцыі айчынных вытворцаў і страў нацыянальнай кухні, згодна з якім выбаршчыкі змогуць паспрабаваць кандытарскія вырабы, мясныя прадукты і сыры, напоі і сокі. На кожную з дэгустацый адведзена па дзве гадзіны.
Выбаршчыкам таксама будуць прапаноўваць бясплатную гарбату, тавары і прадукты па зніжаных цэнах. Абяцаны пашыраны продаж плодаагародніннай прадукцыі, пашыраны распродаж хлебабулачных і кандытарскіх вырабаў, пашыраная выстава-продаж літаратурных навінак і друкаваных выданняў.
«Шмат каму з Вас выпадзе шанец атрымаць у падарунак бонусную карту сеткі крам «Суседзі» і пастаянна дзеючую дысконтную карту на зніжку 8% на ўсе тавары ў універмагу «Гандлёвы дом «На Нямізе», — гаворыцца ва ўлётцы.
Тым, хто прыйдзе галасаваць ўсёй сям'ёй, абяцаюць «фота на памяць».
«Прыйдзі і зрабі СВОЙ ВЫБАР!» — заклікае ўлётка.
«Фемінізм у маім выпадку перамог». Вераніка Станкевіч — пра дапамогу палітвязням у «Вольных» і планы на вяселле з Івуліным24
Каментары