Z pačutaha ŭ Bierlinie: «My Łukašenku nie daviarajem», a avijabazu ličać vyrašanaj spravaj 

U niamieckich palityčnych kołach nichto da kanca nie vieryć u namier Alaksandra Łukašenki narmalizavać adnosiny ź Jeŭrasajuzam. Adnačasova niamieckija dypłamaty miarkujuć, što avijabaza ŭ Babrujsku budzie raźmieščana. U acenkach Bierlina, Łukašenka absalutna niesamastojny ŭ hetym pytańni.

Što da kredytu MVF, to nastroj nastupny. Kali Biełaruś pojdzie na strukturnyja reformy, kredyt daduć. Kali nie – hrošaj fondu nie budzie. Na heta ŭpłyvaje jak papiaredni vopyt adnosin z Alaksandram Łukašenkam, tak i mižnarodnaja kańjunktura. «MVF navučany dośviedam Hrecyi i zaraz nie schilny budzie davać hrošy prosta tak», — skazaŭ mnie adzin z deputataŭ bundestaha.

Ahułam, staŭleńnie da Alaksandra Łukašenki ŭ Niamieččynie nahadała mnie toje, ź jakim ja sutyknuŭsia ŭ 2010 hodzie ŭ Vašynhtonie. Tady častka biełaruskich ekśpiertaŭ mieła iluzii nakont libieralizacyi, a ŭ damovie nakont biełaruskich atamnych materyjałaŭ, padpisanaj Klintan i Martynavym, bačyła krok da narmalizacyi biełaruska-amierykanskich adnosin i admovy Minska ad palityki kanfrantacyi. Amierykanskija dypłamaty byli, miakka kažučy, skieptyčnyja da takich acenak.

Z anałahičnym pačućciem hetym razam ja viartaŭsia ź Bierlina. Mnie daviałosia pahavaryć z šeraham deputataŭ bundestaha ad Chryścijanska-demakratyčnaha sajuza, a taksama z ekśpiertami i čynoŭnikami. Mierkavańnie ich było davoli adnastajnym. Na ich dumku, kroki Alaksandra Łukašenki nielha prymać usurjoz.

«My hetamu čałavieku nie daviarajem», — skazaŭ adzin z čynoŭnikaŭ. «My nie durnyja», — zajaviŭ, u svaju čarhu, adzin z deputataŭ.

Što da avijabazy, to niemcy ŭsprymajuć hetuju spravu pieradvyrašanaj. Na ich dumku, Łukašenka zbudavaŭ takuju ekanamičnuju madel, pry jakoj Biełaruś absalutna zaležyć ad rasijskich enierhanośbitaŭ, i heta daść Maskvie mahčymaść pradušvać tut lubyja svaje płany. Namier Pucina bazu raźmiaścić niamieckija ekśpierty ličać ćviordym. A fakt, što jon svoj płan ahučyŭ biez kansultacyi z Alaksandram Łukašenkam, ličać znakam.

Uvohule, niekatoryja palityki navat z CHDS, nie kažučy pra sacyjał-demakrataŭ, schilnyja źmirycca z tym, što dalejšyja rašeńni ab losie Biełarusi buduć prymacca ŭ Maskvie. Viadoma, aficyjnaja pazicyja ŭrada zastajecca inšaja. Niamieckaja dypłamatyja chacieła b, kab Biełaruś sama rabiła vybar šlachu svajho raźvićcia, i vieryć, što taki šaniec jašče jość.

Siońnia Hiermanija hatovaja pašyryć kantakty ź biełaruskimi čynoŭnikami. Razhladajucca taksama asobnyja kroki dla raźvićcia mižludskich kantaktaŭ. Naprykład, udzielniki niamiecka-biełaruskaj deputackaj hrupy abmiarkoŭvajuć ź viedamstvam Štajnmajera ideju dać prava biaźvizavaha ŭjezdu moładzi da 18 ci da 21 hoda. Adnak admienu viz dla biełarusaŭ u cełym nichto navat nie razhladaje – na ahulny skieptycyzm u hetym pytańni nakłaŭsia kryzis ź mihrantami, i tema stała palityčnym tabu.

Praktyčnaja palityka što da Biełarusi zastaniecca raniejšaj. Krainy Jeŭrasajuza zachavajuć adziny padychod. U farmiravańni biełaruskaj palityki vyrašalnaje słova budzie za Hiermanijaj, Polščaj, Litvoj i Šviecyjaj. Krainy Zachodniaj i Paŭdniovaj Jeŭropy nie buduć umiešvacca ŭ hetaje pytańnie.

Na kožny krok Minska pa źmianšeńni kanfrantacyi budzie rabicca mały krok u adkaz. Jeŭrapiejcy schilnyja ličyć, što Alaksandr Łukašenka nie admovicca ad palityki varožaści. Ale hatovyja i na lubyja kroki nasustrač, jakija tolki biełaruski režym paličyć mahčymym.

Prezidenckija vybary, što prajšli 11 kastryčnika, u Bierlinie družna ŭsprymajuć jak fars. Inšaja sprava, što prychilniki «reałpalityki» schilnyja ŭsprymać Biełaruś jak krainu «druhoj katehoryi», ad jakoj nie vypadaje čakać demakratyi.

• 0
• 0
• 0
• 0
• 0
• 0
• 0
• 0