U Minsku da maja 2016 hoda realizujuć piłotny prajekt pa stvareńni adasoblenaj pałasy dla ruchu hramadskaha transpartu, paviedamiŭ žurnalistam dyrektar dziaržustanovy «Staličny transpart i suviaź» Valeryj Škurataŭ.
«Raspracavana prapanova pa budaŭnictvie adasoblenych pałos. U cełym płanujem stvaryć kala 73 km takich pałos. Pieršy piłotny prajekt my majem namier realizavać na skryžavańni Łabanka — Prytyckaha. Zakazčykam vystupić UKB Frunzienskaha rajona. Niedzie da maja tam budzie abstalavana piłotnaja zona», — skazaŭ Valeryj Škurataŭ.
Piłotny prajekt praduhledžvaje vynas prypynačnych punktaŭ u pieršuju pałasu i stvareńnie vydzielenych pałos dla ruchu transpartu. Pry hetym prapusknaja zdolnaść hetaha ŭčastka nie źnizicca, zapeŭniŭ dyrektar DU «Staličny transpart i suviaź».
Pavodle jaho słoŭ, na niekatorych učastkach chutkaść pieramiaščeńnia hramadskaha transpartu siońnia składaje 8 km/h, faktyčna jana pryraŭnoŭvajecca da chutkaści piešachoda, što niedapuščalna. Tam, dzie jość takija prablemy, treba vydzialać asobnyja pałosy i stvaryć umovy, kab transpart moh ruchacca chacia b z toj chutkaściu, jakaja jość na inšych učastkach. Na siońnia aŭtobusy i tralejbusy ruchajucca pa horadzie ź siaredniaj chutkaściu 15-17 km/h. «Ale meta chutkasnych pałos — dasiahnuć chacia b 20 km/h», — skazaŭ dyrektar dziaržustanovy.
Valeryj Škurataŭ adznačyŭ, što pastupova nasielnictva dla apłaty prajezdu pierachodzić na bieskantaktnyja smart-kartki. Minčanie adychodziać ad razavych pajezdak jak u mietro, tak i ŭ naziemnym transparcie. Pavodle apošniaj infarmacyi, tolki kala 30 pracentaŭ pasažyraŭ kuplajuć žeton abo razavy prajazny kvitok.
Kamientary