Hraboŭskamu nie ŭdałosia abyjści Aviečkina ŭ hałasavańni zaŭziataraŭ

Biełaruskamu forvardu ŭsio ž nie ŭdałosia abyjści Alaksandra Aviečkina u hałasavańni zaŭziataraŭ pa vybary kapitanaŭ kamand na Matč zorak NCHŁ.

Jak viadoma, u hetym siezonie Matč zorak NCHŁ projdzie ŭ novym farmacie. Upieršyniu ŭ šou voźmuć udzieł nie dźvie, a adrazu čatyry kamandy — zbornyja čatyroch dyvizijonaŭ (Centralnaha i Cichaakijanskaha, a taksama Staličnaha i Atłantyčnaha), piša tut.by.

U paŭfinałach kamanda zorak Centralnaha dyvizijona sustreniecca z kamandaj Cichaakijanskaha dyvizijona, a kamanda zorak dyvizijona «Staličny» pazmahajecca z kamandaj Atłantyčnaha dyvizijona. Pieramožcy paŭfinałaŭ paspračajucca za hałoŭny pryz u finalnym matčy. Pieramožca atrymaje 1 miljon dołaraŭ. Matčy buduć prachodzić u farmacie «3 na 3», jak hulajuć ciapier u NCHŁ u aviertajmach.

Vyniki hałasavańnia balelščykaŭ pa vybary kapitanaŭ kamand apublikavaŭ aficyjny sajt NCHŁ. Kapitanam zornaj družyny Staličnaha dyvizijona budzie Alaksandr Aviečkin z «Vašynhtona», ź jakim za lidarstva da apošniaha spračaŭsia biełaruski napadajučy Michaił Hraboŭski z «Ńju-Jork Ajłenderz». Dla Aviečkina majučy adbycca Matč zorak stanie šostym u karjery.

Matč zorak NCHŁ projdzie 31 studzienia, kali Michaił Hraboŭski adznačyć svoj 32-i dzień naradžeńnia. U pačatku śniežnia dzieci Hraboŭskaha zaklikali zaŭziataraŭ hałasavać za svajho tatu.

Apytańnie, dastupnaje lubomu zaŭziataru, finišavała 1 studzienia. Hałasavać možna nie bolš za 10 raz za dzień.

Kapitanam kamandy Atłantyčnaha dyvizijona abrany 43-hadovy Jaramir Jahr z «Fłarydy».

Napadajučy «Čykaha» Patryk Kiejn, jaki lidyruje ŭ sprečcy bambardziraŭ siezonu, stanie kapitanam kamandy Centralnaha dyvizijona.

Absalutnym pieramožcam hałasavańnia zaŭziataraŭ staŭ 33-hadovy tafhaj z «Aryzony» Džon Skot, jaki ŭ ciapierašnim čempijanacie adyhraŭ u 11 pajadynkach i zarabiŭ 1 (0 + 1) bambardzirski bał. Jon budzie kapitanam kamandy Cichaakijanskaha dyvizijona.

Sam Džon Skot byŭ ździŭleny chodam hałasavańnia, u jakim adrazu ž zachapiŭ lidarstva: «Ja nie viedaju, što adbyvajecca, starajusia trymacca ŭbaku ad usiaho hetaha. Usie paviedamlajuć mnie, jak idzie hałasavańnie. Mabyć, ja čamuści padabajusia zaŭziataram. Dumaju, heta chutčej žart. Ja dakładna nie chaču, kab mianie vybrali na Matč zorak. Było b kruta, viadoma, ale zaraz ja hetaha nie zasłuhoŭvaju».

Forvard «Fłarydy» Jaramir Jahr padzialiŭsia novymi aściarohami z nahody Matču zorak NCHŁ.

Z humaram u svaim tvitary prakamientavaŭ trapleńnie na matč zorak tafhaja z «Aryzony» Jaramir Jahr, jaki 15 lutaha adznačyć 44-hodździe: «Raniej ja bajaŭsia, što farmat 3 na 3 na Matčy zorak moža mianie zabić. Ciapier ja bolš bajusia, što bojka z Džonam Skotam - 6,8 futa, 300 funtaŭ (2,03 mietra, 136 kh - Red.) zabje mianie napeŭna».

Imiony astatnich 40 hulcoŭ na Matč zorak NCHŁ adbiare Departamient chakiejnych apieracyj lihi, jany buduć abvieščanyja 6 studzienia. Kožnaja kamanda lihi pavinna być pradstaŭlena na Matčy zorak choć by adnym hulcom.

U kožnaj zbornaj budzie pa 11 hulcoŭ (6 forvardaŭ, 3 abaroncy i 2 bramniki).

Adznačym, što ŭ minułym siezonie pry vybary chakieistaŭ na Matč zorak NCHŁ niezvyčajnuju aktyŭnaść prajavili łatvijskija zaŭziatary, jakija prasunuli na šou svajho suajčyńnika, na toj momant 20-hadovaha forvarda Ziemhusa Hirhiensonsa z «Bafała».

• 0
• 0
• 0
• 0
• 0
• 0