Urad Turcyi daść biaspłatny dostup da internetu dla siemjaŭ ź minimalnym dastatkam. Jak paviedamiła hazieta «ChabierCiurk», z adpaviednaj inicyjatyvaj vystupiła Ministerstva pa spravach siamji i sacyjalnaj palityki.
Jak zajaviła kiraŭnik viedamstva Siema Ramazanahłu, u bližejšyja dni prajekt «Biaspłatny internet dla biednych siemjaŭ» budzie aformleny zakanadaŭča. Adnoj ź jaho metaŭ źjaŭlajecca padtrymka płanaŭ urada pa maksimalnym raspaŭsiudžvańni dostupu da sieciva ŭ respublicy, a taksama pa pryciahnieńni da karystańnia internetam žančyn i dziaciej.
Pa słovach Ramazanahłu, biaspłatny dostup da suśvietnaha pavucińnia budzie davacca siemjam, čyj dachod nižejšy za peŭnuju minimalnuju płanku. Ceny na suviaź u Turcyi adnosna vysokija. Za paraŭnalna chutki dostup pa kabieli pryjdziecca płacić kala $30-50 u miesiac. Dla siemjaŭ z maleńkim prybytkam takija vydatki čaściakom vyklučanyja.
«Taksama my budziem zabiaśpiečvać hetyja siemji płanšetnymi abo nastolnymi kampjutarami. My chočam, kab dziakujučy hetamu prajektu ŭ dziaciej źnikła zvyčka źnikać u internet-kafe. Vielmi mnohija dzieci z-za hetaha nie znachodziacca doma, iduć u hetyja kafe, pačynajuć palić, prymać ałkahol i narkotyki», — skazała ministr.
Akramia techničnaha pradastaŭleńnia dostupu da sieciva ministerstva płanuje zaścierahčy dziaciej ad niepažadanych materyjałaŭ, jakija jany mohuć tam znajści. Dla hetaha na ŭzroŭni pravajderaŭ budzie ŭvodzicca filtravańnie ŭsich złučeńniaŭ karystalnikaŭ. Ci budzie hetaja miera prymusovaj dla siemjaŭ, jakija karystajucca ŭmovami prajekta, pakul nie ŭdakładniajecca. Pa zmaŭčańni nijakaj filtracyi trafiku, akramia zabaronienych pa rašeńni suda sajtaŭ, pravajder nie ažyćciaŭlaje. Ale kožny karystalnik moža abrać u ahulnych naładach svajho złučeńnia na partale pravajdera adzin ź niekalkich filtraŭ. Niekatoryja abanienty karystajucca hetaj pasłuhaj, kab zaścierahčy svaich dziaciej ad niepažadanych resursaŭ.
Kamientary