Čarnasociency: «Hod kultury ŭ Biełarusi dyskryminuje ruskamoŭnuju bolšaść»

Na sajcie ŭrada źjaviŭsia «Respublikanski płan mierapryjemstvaŭ pa praviadzieńni ŭ 2016 Hoda kultury». Śpis utrymlivaje až 121 pazicyju.

Pavialičyć

Cikavym padajecca raździeł «Palityčnaja kultura». Źviartaje ŭvahu, što mienavita siudy ŭklučyli praviadzieńnia «Dnia vyšyvanki» ŭ lipieni. Adkaznym za praviadzieńnie pryznačany BRSM.

Punktam 19 idzie: «Praviadzieńnie z nasielnictvam i pracoŭnymi kalektyvami šyrokamaštabnaj rastłumačalnaj raboty pa pytańniach racyjanalnaha vykarystańnia paliŭna-enierhietyčnych i materyjalnych resursaŭ, u tym liku hrašovych srodkaŭ, a taksama pavyšeńnia efiektyŭnaści vykarystańnia resursaŭ». U mierapryjemstvy da hoda kultury ŭklučajuć navat takija: «Aśviatleńnie na sajtach respublikanskich orhanaŭ dziaržaŭnaha kiravańnia, miascovych vykanaŭčych i rasparadčych orhanaŭ kiravańnia, u drukavanych srodkach masavaj infarmacyi chodu realizacyi Dyrektyvy prezidenta Respubliki Biełaruś ad 14 červienia 2007 h. № 3 «Ekonomija i bieriežlivosť – hłavnyje faktory ekonomičieskoj biezopasnosti hosudarstva» (Nacionalnyj riejestr pravovych aktov Riespubliki Biełaruś, 2007 h., № 146, 1/8668)».

U abaviazki Nacbanka i abłvykankamaŭ uvachodzić praviadzieńnie z nasielnictvam infarmacyjnaj pracy pa pytańniach praviadzieńnia denaminacyi.

Varta adznačyć, što mnohija mierapryjemstvy, jakija ŭklučanyja ŭ płan, prachodziać i tak kožny hod biez usialakich «Hadoŭ kultury», jak «Słavianski bazar», «Halšanski zamak», «Paŭnočnyja Afiny», «Klič Paleśsia», «Aleksandryja źbiraje siabroŭ», «Noč muziejaŭ».

Siarod jubilejaŭ i kruhłych dataŭ adznačanyja 140-hodździe Ciotki, 125-hodździe Bahdanoviča, 120-hodździe Kandrata Krapivy, 95-hodździe Šamiakina i Mieleža, 75-hodździe Mulavina.

Punkt 45 praduhledžvaje «realizacyju mierapryjemstvaŭ pa zachavańni historyka-kulturnaj spadčyny». Adnak jon naličvaje tolki dva punkty: zaviaršeńnie pieršaj čarhi restaŭracyjna-adnaŭlenčych rabot u kaściole Božaha Cieła ŭ Niaśvižy i zaviaršeńnie rekanstrukcyi z restaŭracyjaj pomnika architektury XVIII stahodździa Śviata-Pakroŭskaha manastyra ŭ Tałačynie.

Jość ceły raździeł, jaki pryhoža nazyvajecca «Pašyreńnie vykarystańnia biełaruskaj movy». Zdavałasia b, dobraja inicyjatyva, adnak na spravie nie ŭsio tak dobra. «Pašyreńnie» abmiažoŭvajecca praviadzieńniem niekalkich kulturnych imprezaŭ i kruhłych stałoŭ da Dnia rodnaj movy, arhanizacyja Dnia piśmiennaści ŭ Rahačovie, sustrečy ź piśmieńnikami, pašyreńnie hurtkoŭ krajaznaŭcaŭ.

Dastatkova cikavym moh vyhladać punkt 60 «Pavieličeńnie abjomaŭ viaščańnia na biełaruskaj movie ŭ infarmacyjnych i analityčnych prahramach», adnak heta tyčycca tolki pieradač i navin pra kulturu. Znoŭ sutykajemsia sa staroj zahannaj tradycyjaj, što pa-biełarusku možna havaryć tolki pra litaraturu i mastactva, a voś pra sport, šou-biznes ci ekanomiku – nie.

Adnak navat taki kurtaty śpis mierapryjemstvaŭ vyklikaje zuboŭny skryhat na rasijskich šavinistyčnych sajtach. Naprykład, regnum.ru adreahavaŭ tak:

«Raździeł «Pašyreńnie vykarystańnia biełaruskaj movy» źmiaščaje dziasiatak mierapryjemstvaŭ, jakija vidavočna dyskryminujuć ruskamoŭnuju bolšaść Biełarusi.

«Biełorusizatary» pad «rodnaj movaj» razumiejuć zusim nie ruskuju, jakaja maje roŭny status ź biełaruskaj, što zamacavana Kanstytucyjaj, ale nie pieraškadžaje šmathadovaj praktycy źniščeńnia ruskamoŭnaj tapanimiki i inšym mierapryjemstvam u ramkach derusifikacyi.

«Ułady postsavieckaj respubliki ŭ miežach palityki «biełarusizacyi» sprabujuć stvaryć novuju identyčnaść biełarusaŭ. Realizujučy dadzieny kurs, u «biełarusy» i «znakamityja ziemlaki» zapisvajucca pradstaŭniki kultur inšych narodaŭ — naprykład, polski teraryst Vikiencij Kalinoŭski, polski kampazitar Michał Kleafas Ahinski, polski paet Adam Mickievič i mnohija inšyja» – piša regnum.ru.

Nu a ŭ mierapryjemstvy da «Hoda kultury» ŭklučyli navat praviadzieńnie respublikanskich subotnikaŭ u krasaviku i azielanieńnie haradskich kłumbaŭ.

• 0
• 0
• 0
• 0
• 0
• 0
• 0
• 0