U «Biełavija» źjaviłasia pieršaja dziaŭčyna-piłot
Joju stała 28-hadovaja Śviatłana Jaromienka. Da hetaha dziaŭčyna lotała na sudnach avijakampanij «Pskoŭavija» i «Transaera». Kiravała pasažyrskimi samalotami An-24/An-26, a paźniej i Boeing-737NG. Zaraz jana prachodzić stažyroŭku ź instruktaram, ale ŭžo ŭ chutkim časie zojmie miesca druhoha piłota na biełaruskich rejsach, jakija vykonvaje Boeing-737NG.
Miłavidnaja vypusknica Sankt-Pieciarburhskaha dziaržaŭnaha ŭniviersiteta hramadzianskaj avijacyi naradziłasia ŭ avijacyjnaj siamji ŭ Jakucii. Tata Śviatłany byŭ hałoŭnym inžynieram słužby ERTAS (słužba ekspłuatacyi radyjotechničnaha abstalavańnia i suviazi), a mama — načalnikam mieteastancyi, raspaviali Onliner.by ŭ pres-słužbie avijakampanii.
— I muž Śviatłany taksama piłot, — adznačyli ŭ «Biełavija». — Jon pracuje ŭ Sankt-Pieciarburhu.
Śviatłana pracuje ŭ «Biełavija» ź listapada minułaha hoda. I stała pieršaj žančynaj-piłotam za ŭsiu historyju kampanii. Joj daviadziecca pracavać u kalektyvie sa 194 mužčynami.
Dziaŭčyna ŭžo prajšła navučańnie ŭ kampanii: u tym liku naziemnuju tearetyčnuju i trenažornuju padrychtoŭku. Jana paśpieła źlatać 29 śniežnia ŭ Ašchabad. I praz paru miesiacaŭ pasažyry zmohuć pabačyć Jaromienka ŭ kabinie na miescy druhoha piłota. A ŭžo ciapier voś hetaje fota dziaŭčyny krasujecca na hałoŭnaj staroncy časopisa ICON.
— U sučasnym śviecie ŭžo daŭno nie dzielać prafiesii na «mužčynskija» i «žanočyja», — ličyć dziaŭčyna. — I kali ŭ čałavieka jość žadańnie, dazvalaje zdaroŭje i atrymana jakasnaja adukacyja, jon spraŭlajecca sa svaimi abaviazkami, to całkam nie važna, jakoha jon połu. Samalotu ŭsio roŭna, chto im kiruje, kali ŭsie pracedury vykonvajucca ŭ adpaviednaści z patrabavańniami biaśpieki.
U samoj kampanii kažuć, što źjaŭleńniu piłota-žančyny tolki rady.
— Prafiesijanalizm nie adroźnivaje mužčyn i žančyn, tamu my płanujem, što kolkaść žančyn-piłotaŭ budzie pavialičvacca, — prakamientavaŭ źjaŭleńnie dziaŭčyny hienieralny dyrektar AAT «Avijakampanija «Biełavija»» Anatol Husaraŭ.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal5
Kamientary