U kancy 2013 hoda pry padtrymcy Ministerstva kultury vyjšła kniha, jakaja, na žal, zastałasia niezaŭvažnaj — «Mifałohija biełarusaŭ», aŭtar Aleś Šamak. Pryčyna adna — nakład nievialiki i ŭvieś byŭ raźmierkavany pa dziaržaŭnych biblijatekach. Ci budzie paŭtornaje vydańnie bolšym tyražom — pytańnie zastajecca adkrytym. Ale biełarusam treba pačytać hetuju knihu, kab viedać toj płast, jaki lažyć u padmurku kultury našaha naroda.
Pieršaja častka knihi — tearetyčnaja. U joj koratka pieraličany asnoŭnyja elemienty mifałohii biełarusaŭ jak cełasnaj sistemy, z aznačeńniem jaje śpiecyfičnych rys. Najbolš admietnaje ŭ knizie — heta najaŭnaść takich elemientaŭ mifałohii jak mifičnyja hieroi; dzialeńnie suśvietu na peŭnyja častki ź ich biełaruskimi najmieńniami; vyznačeńnie panteonu bahoŭ i duchaŭ z łakalizacyjaj ich adpaviedna z prastoravaj strukturaj; pačatak suśvietu ad Biełaha i Čornaha bahoŭ. Aŭtar daje łahičnaje abhruntavańnie hetym elemientam.
Druhaja, značna bolšaja, častka knihi — heta teksty mifaŭ. I tut taksama šmat novaha.
Pa-pieršaje, uvieś korpus tekstaŭ raskładzieny z ulikam struktury našaj mifałohii. Dziakujučy hetamu farmirujecca adčuvańnie jaje cełasnaści. Navat tyja teksty, jakija vykarystoŭvalisia ŭ vydańniach inšych aŭtaraŭ i stali chrestamatyjnymi, u kantekście hetaj knihi nabyvajuć dadatkovaje hučańnie i asensavańnie.
Pa-druhoje, aŭtar uvodzić u abaračeńnie značnuju kolkaść tekstaŭ, jakija da hetaha času abychodzili inšyja daśledčyki. Usie teksty pazyčanyja ŭ inšych daśledčykaŭ majuć spasyłki adkul jany ŭziaty.
Pa-treciaje, vialiku častku abjomu raździeła «Teksty» składajuć mify, zapisanyja ŭ čas falkłornych praktyk studentaŭ-fiłołahaŭ Biełaruskaha dziaržaŭnaha piedahahičnaha ŭniviersitetu imia Maksima Tanka ŭ pieryjad 90-ch hadoŭ XX i pačatku XXI stahodździaŭ. Hetyja teksty, jakija aŭtar zachavaŭ u svaim pryvatnym archivie, naohuł drukujucca ŭpieršyniu.
Knihu A. Šamaka «Mifałohija biełarusaŭ» možna spampavać biaspłatna ŭ PDF farmacie.
Ciapier čytajuć
Škołu dla dziaciej ź psichičnymi asablivaściami ŭ Minsku pierarobiać u kadeckaje vučylišča. Da realizacyi išli 18 hadoŭ12
Kamientary