Nočču z 15 na 16 sakavika ŭ centry Minska zatrymanyja čaćviora maładych ludziej, jakija zajmajucca prodažam aptovych partyj narkotykaŭ. Śpiecapieracyja była praviedziena supracoŭnikami narkakantrolu MUS, HUUS Minharvykankama, Partyzanskaha RUUS stalicy pry padtrymcy bajcoŭ atrada chutkaha reahavańnia.
Členy złačynnaj hrupy arhanizavali internet-placoŭku dla realizacyi sintetyčnych narkotykaŭ i spajsaŭ dyleram nižejšaha źviana, jakija, u svaju čarhu, pradavali «tavar» spažyŭcam. Vyjaŭleńnie złamyśnikaŭ uskładniałasia ich viedami ŭ śfiery abarony infarmacyi. Usie čaćviora akazalisia studentami 18—20 hadoŭ, troje ź ich navučalisia ŭ viadučaj techničnaj VNU krainy. Darečy, dla znosin padazravanych z klijentami vykarystoŭvaŭsia internet i śpiecyjalnaja šyfravanaja prahrama, adnak heta nie pieraškodziła apieratyŭnikam vyjavić miescy zakładak i vykryć tych, kamu jany pryznačalisia.
Zatrymańnie adbyvałasia ŭ zdymnaj dvuchuzroŭnievaj kvatery, jakaja vykarystoŭvałasia dla kiravańnia pracesam, paviedamlaje pres-słužba UUS Minharvykankama. Pryčym sami zatrymanyja narkamanami nikoli nie byli.
Pravodziacca dalejšyja apieratyŭna-śledčyja mierapryjemstvy pa ŭstalavańni ŭsich epizodaŭ złačynnaj dziejnaści padazravanych, a taksama ich mahčymych saŭdzielnikaŭ. Jość padstavy mierkavać, što «kuratar» maładych ludziej znachodzicca za miežami Biełarusi.
Ekśpiertami ŭžo paćvierdžana, što bolš za 200 hramaŭ kanfiskavanaha rečyva źjaŭlajecca sintetyčnym narkotykam (hetaj kolkaści chapiła b na bolš čym tysiaču doz). Pa astatnim abjomie kanfiskavanaha ekśpiertyza jašče pravodzicca.
Adzin z zatrymanych mieŭ namier niezakonnym šlacham naźbirać hrošaj na adkryćcio lehalnaha biźniesu ŭ budučyni, adnak nie paśpieŭ. Bo, jak jon sam skazaŭ apieratyŭnikam, tyja «vielmi dobra pracujuć».
Biełaruscy pa pašparcie 120 hadoŭ. Ale ŭ knihu Hiniesa jaje nie zapišuć — i voś čamu7
Kamientary