Klučavyja prapanovy Labiedźki

Anatol Labiedźka prapanuje demakratyčnym siłam u 2008 i 2010 hadach dziejničać pa toj ža schiemie, što i ŭ 2004 ci 2006-m. Kamentar redakcyi.

«Staršynia Abjadnanaj hramadzianskaj partyi (AHP) Anatol Labiedźka prapanoŭvaje nacyjanalnym lideram uznačalić adziny śpis kandydataŭ Abjadnanych demakratyčnych sił (ADS) na parłamienckich vybarach 2008 hoda. Pra heta jon skazaŭ 20 krasavika na XI źjeździe AHP.

«Nieabchodna, kab Alaksandr Kazulin, Alaksandr Milinkievič, Mikałaj Statkievič, Stanisłaŭ Šuškievič piersanalna zajavili pra svajo žadańnie ŭznačalić adziny śpis, — zaznačyŭ palityk. — Jany pavinny ŭziać pad asabistuju adkaznaść adnu z akruhaŭ Minska. Mienavita adsiul pavinny pajści pieramieny pa ŭsioj krainie».

A.Labiedźka akcentavaŭ uvahu na A. Kazulinie, jaki, jak viadoma, adbyvaje pakarańnie ŭ papraŭčaj kałonii. »Kali jon zajavić pra žadańnie vyłučacca ŭ deputaty z turmy, to jaho, viadoma, nie zarehistrujuć. Ale ludzi pavinny viedać, što jon hatovy pavieści ich za saboju. Aprača taho, zamiest jaho moža vyłučacca jaho dačka», — ličyć lider AHP.

Pavodle słoŭ A. Labiedźki, pradstaŭniki Abjadnanaj hramadzianskaj partyi hatovy vyłučacca pa piaci akruhach Minska. «Kali znojducca nacyjanalnyja lidery, hatovyja vyłučycca pa Minsku, našy kandydaty z adzinaha śpisu sastupiać im svaje akruhi», — skazaŭ jon.

Palityk taksama ličyć važnym pačać pieramovy ab adzinym kandydacie ad demsił na prezidenckich vybarach 2011 hoda. A. Labiedźka ŭpeŭnieny, što ŭžo ciapier nieabchodna rychtavać stratehiju dziejańniaŭ demakratyčnych sił padčas prezidenckaj kampanii, raspracoŭvać praviły vyłučeńnia adzinaha kandydata.

Aprača taho, jon prapanavaŭ pravieści letam čarhovy Kanhres demakratyčnych sił. «Dataj jaho praviadzieńnia moža być 27 lipienia. Kanhres možna pravieści adkrytym, śviatočnym, kab kožny hramadzianin moh pryjści tudy i pačuć, što zrabili demsiły na praciahu apošniaha hoda», — ličyć lider AHP».

Heta paviedamlaje ahienctva BiełaPAN.

Prapanovy A. Labiedźki kankretnyja i jasnyja.

Stary‑novy lider AHP znajšoŭ farmuloŭku dla svajho supiernika ad 2005 hodu Milinkieviča — nacyjanalny lider, pry hetym pastaviŭšy Milinkieviča, katory zastajecca samym paznavalnym dziejačom apazycyi, u adzin šerah ź pieršym kiraŭnikom RB i dvuma palitviaźniami, «dziejny» ź jakich maje ambicyju z nacyjanalnaha stać ahulnanacyjanalnym.

Kidajecca ŭ vočy, što A. Labiedźka prapanuje demakratyčnym siłam dziejničać hetaksama jak jany toje rabili ŭ 2004 ci 2006 hadach. H.zn., dziejničać pa praviłach, pa jakich apazycyja dziejničała ŭ napaŭaŭtarytarnych krainach, jak Ukraina, Serbija ci Zymbabve (i ŭrešcie dabivałasia ŭ ich pośpiechu). Udzielničać u vybarach, chaj i na niaroŭnych umovach. Stvarać i zachoŭvać kaalicyju i vyłučać kandydataŭ. Vyłučać adzinaha kandydata na prezydenckija vybary, pakul jany pravodziacca, pakul apazycyjnaha kandydata rehistrujuć, i vieści prezydenckuju kampaniju, robiačy vyhlad, što ŭ krainie viadziecca kampanija, navat u sytuacyi, kali ŭ tvajoj mašynie štonoč prabivajuć koły, a sustrečy z vybarcami razhladajucca jak niesankcyjavanyja mitynhi. Labiedźka pierakanany, što navat paralizavanaja kampanija lepšaja, čym bajkot na kuchniach, i buduje raźlik na tym, što ŭłady niekali ŭ niejki ž kamień dy spatyknucca kaliści.

Palityčnyja ŭmovy ŭ Biełarusi nie iduć u paraŭnańnie z ukrainskimi‑2004, venesuelskimi‑2007 i navat zimbabvijskimi‑2008, bo ŭ Biełarusi niama navat u asłablenym vyhladzie nivodnaj niezaležnaj haliny ŭłady. Nie zastałosia nivodnaha lehalnaha ahulnadastupnaha ŚMI, jakoje b adlustroŭvała b pazycyju apazycyi. Padlik hałasoŭ pravodzicca kielejna, a tych, chto padličvaje, pryznačaje faktyčna adzin z kandydataŭ. Jon ža za dziaržaŭny košt utrymlivaje svaich prapahandystaŭ. Bolš za toje, jahonaja idealohija abvieščanaja dziaržaŭnaj, a ŭsie, chto suprać jaho, atrymali status «antydziaržaŭnych siłaŭ». Dla zamacavańnia takoj sytuacyi biez vahańniaŭ užyvajecca siła, u vyniku na momant minułych vybaraŭ za kratami siadzieli ŭsio kiraŭnictva štaboŭ i štabikaŭ apazycyjnaha kandydata — što nie zaškodziła, praŭda, adbycca Płoščy.

Što vynikaje z schiemy Labiedźki? Što pry takich akaličnaściach apazycyja ŭsio ž hatovaja pajści na vybary‑2010 pa schiemie vybaraŭ‑2006, što adziny kandydat musić vyznačacca šlacham «pieramovaŭ» — majucca na ŭvazie, badaj, mižpartyjnyja pieramovy.

Lideram apazycyi‑2010, kali trymacca hetaj schiemy, nia maje prava stać Kazulin, bo nia maje prava balatavacca, zhodna z vynikami sudu, i majuć źnikomyja šancy stać niejkija novyja lidery. Šancy majuć Milinkievič, sam Labiedźka i viečna treci Kalakin z PKB.

Imavierna, Labiedźka prapanuje apazycyi paŭtor scenaru 2004‑2006, bo miarkuje, što jana nia maje dastatkova resursu, voli i prastory dla maneŭru, kab zrealizavać niejki inšy scenar. Mahčyma, heta sapraŭdy tak.

Jakija alternatyŭnyja prapanovy, inšyja stratehii? Na hetaje pytańnie pavinny prahučać takija ž jasnyja adkazy, jak Labiedźkaŭ. Dobra było b, kab inšyja partyi i hramadzkija siły, što atajesamlajuć siabie z apazycyjaj i alternatyvaj, nia bavilisia z farmulavańniem ich, kali chočuć kab ichnyja prapanovy ŭsurjoz abmiarkoŭvalisia. Tym bolš što nastupnyja vybary prypadajuć taki skarej na kaniec 2010, a nie 2011 hodu.

• 0
• 0
• 0
• 0
• 0
• 0
• 0
• 0