Prajekciroŭščyki pakazali, jak budzie vyhladać płošča Banhałor u Minsku. Im skazali padumać lepš
Prajekciroŭščyki pradstavili 5 varyjantaŭ, jak zvonku budzie vyhladać stancyja mietro na płoščy Banhałor u Minsku. Idei acanili členy architekturna-horadabudaŭničaj rady, piša «Minsk-Naviny».
Kanstruktyŭnaje rašeńnie budučaha zbudavańnia ŭžo vyznačana i ŭzhodniena z «Dziaržbudekśpiertyzaj», a voś źniešni vyhlad prajektny instytut vyrašyŭ vynieści na abmierkavańnie ekśpiertaŭ.
Papiarednie hałoŭny architektar prajektaŭ Juryj Maciaš raskazaŭ, što rychtavałasia šmat viersij. Adnak na sud rady vynieśli piać varyjantaŭ.
Habaryty vientšachty — 32 × 22 × 6 m, jana intehravanaja ŭ interjer stancyi «Park Družby narodaŭ», jakaja ŭ pierśpiektyvie budzie pierasadačnaj na 4-ju liniju padziemki. Budova kryžapadobnaja pa formie, uviersie — dva zienitnyja lichtary, jakija dajuć vierchniaje śviatło. Jana niemaleńkaja i stanie akcentam. Tamu važna, jak budzie vyhladać na placy.
Što prapanavali śpiecyjalisty
Varyjant 1
Minimalistyčna. Płanujecca nie chavać šachtu abo nie dekaravać jaje z hetaj metaj, a pakinuć bietonnyja kanstrukcyi ŭ ciomna-šerym kolery.
Varyjant 2
Adroźnivajecca tym, što fasad ablicoŭvajecca kieramahranitam abo robicca tak zvanaje spajdernaje škleńnie, što palahčaje zbudavańnie. Spajdernaje škleńnie fasadaŭ — sposab macavańnia šklanych panelaŭ da fasada budynka z dapamohaj śpiecyjalnych kranštejnaŭ, jakija nazyvajuć spajderami. Jany majuć svojeasablivuju formu pavuka.
Varyjant 3
U takoj viersii prapanujecca adciahnuć uvahu ad kanstrukcyi. Uličvajučy, što pobač znachodzicca park Družby narodaŭ, architektary vyrašyli raźvić temu i stvaryć na płoščy kruhłyja karali z fłahštokami, dzie raźmieściacca ściahi družalubnych dziaržaŭ. U centry — biełaruski. Sam masiŭ vientkamiery schavajuć kałonapadobnyja tui.
Varyjant 4
Vakoł zbudavańnia — svojeasablivy pojas, jaki abmiažoŭvaje dostup da abjekta i, jak šyrma, zatulaje jaho z roznych bakoŭ. Na pavierchniach, što aharodžvajuć kanstrukcyi, možna napisać słova «siabroŭstva» na roznych movach. Fłahštoki ŭ hetaj viersii zachoŭvajucca.
Varyjant 5
Tut źjaŭlajecca Kurhan družby, schiły jakoha całkam schavajuć vientšachtu. Taksama na schiłach zadumany kvadratnyja ŭstaŭki z žyvoj raślinnaściu (trava, moch). Taki varyjant uładkavańnia daje mahčymaść padjezda śpiectechniki dla absłuhoŭvańnia abjekta. A abličča kurhana za košt spałučeńnia materyjałaŭ nabudzie vizualnuju lohkaść, miarkujuć prajekciroŭščyki.
Što skazali ekśpierty
Padčas abmierkavańnia členy architekturna-horadabudaŭničaj rady adnadušna pryznali niedarečnym rašeńnie sa ściahami.
«Niezrazumieły miemaryjał. Navošta jon? Tym bolš niepadalok na vuł. Arłoŭskaj znachodzicca płošča Dziaržaŭnaha ściaha», — zaŭvažyli vystupoŭcy.
Niechta z ekśpiertaŭ źviarnuŭ uvahu, što kali spyniacca na varyjancie z kurhanam, to lepš jaho vykanać u vyhladzie ziemlanoha adchonu.
A voś viersija sa šklanym fasadam nie samaja aptymalnaja, pakolki ŭ viačerni čas adlustravańnie śviatła far zdolnaje aślaplać aŭtamabilistaŭ.
Prahučali i inšyja mierkavańni: «Kab abhulać vientkamieru, patrebny cikavyja łandšaftnyja pryjomy», «Nie treba ničoha chavać, chaj abjekt zastajecca bačnym, ale vakoł jaho nieabchodna zrabić dobruju piejzažnuju kampazicyju», «Možna «pahulać» z reljefam vakoł i nie abaviazkova paŭtarać formu kruha».
Vyniki padvioŭ hałoŭny architektar stalicy Viktar Hućko, skazaŭšy, što pradstaŭlenym varyjantam nieabchodna dadatkovaja prapracoŭka, pakolki na siońnia rašeńnie nie znojdziena.
Chto toj palitviazień ź Ivanava, jaki vypłaciŭ $600 tysiač kampiensacyi za danaty i ŭsio adno atrymaŭ vialiki termin?5
Chto toj palitviazień ź Ivanava, jaki vypłaciŭ $600 tysiač kampiensacyi za danaty i ŭsio adno atrymaŭ vialiki termin?
«Na praciahu 30 hadoŭ niezaležnaści biełaruskamoŭnyja biuleteni zadavalniali ŭsich». Kamunisty abvinavacili Bondaravu ŭ raspalvańni varožaści na moŭnaj hlebie1616
Kamientary