Aleś Čarkašyn byŭ paśmiarotna ŭznaharodžany ordenam «Narodny hieroj Ukrainy». Niedziaržaŭnuju ŭznaharodu atrymali ŭ Čarnaŭcach siabry Alesia Čarkašyna, jakija pryjechali ź Biełarusi na cyrymoniju ŭhanaravańnia. Orden jany źbirajucca pieradać baćkam «siabra Tarasa» — takuju mianušku mieŭ Aleś Čarkašyn siarod adnapałčanaŭ.
33-hadovy bieraściejec Aleś Čarkašyn vajavaŭ u 5-m bataljonie dobraachvotnickaha ŭkrainskaha korpusu «Pravy sektar» i zahinuŭ u bai pad Starahnataŭkaj 10 žniŭnia 2015 hodu.
Orden «Narodny hieroj Ukrainy» — niedziaržaŭny. «Jak viadoma, mała chto z tych zamiežnikaŭ, chto pryjechaŭ dapamahać nam abaranić svaju ziamlu, atrymaŭ hramadzianstva Ŭkrainy. Nia kažučy ŭžo ab statusie ŭdzielnika bajavych dziejańniaŭ. — piša vydańnie Cienzor.NIET. — Hramadzianie inšych dziaržavaŭ nie atrymlivajuć i ŭznaharodaŭ ad Ukrainy za svaje podźvihi. Hetuju niespraviadlivaść sprabujuć vypravić valantery».
Na cyrymoniju ŭhanaravańnia pryjechali siabry Alesia Čarkašyna Alaksandra Alošyna, Volha Hałčanka i Alaksiej Skobla. Impreza adbyłasia ŭ Čarnavieckaj abłasnoj filarmonii. Akramia Alesia Čarkašyna, ordenami byli ŭznaharodžanyja 15 bajcoŭ, 2 lekara, 5 valanteraŭ i kapelan.
A 28 sakavika ŭ Kijevie adbudziecca ŭračystaje adkryćcio pomnika biełarusam, jakija zahinuli za Ŭkrainu, na Majdanie padčas Revalucyi Hodnaści dy ŭ zonie ATA — Michaiłu Žyźnieŭskamu, Alesiu Čarkašynu dy Vitalu Ciliženku. Pačatak cyrymonii zaplanavany na 12:00 na vulicy Biełaruskaj, 22, u Kijevie.
Ciapier čytajuć
«Svoj nos ź Biełastoka jany nie vysoŭvajuć». Biełarusy Padlašša skardziacca, što biełarusy novaj chvali emihracyi nie zacikaŭlenyja supolnymi spravami

Kamientary