Udzielniki kansultatyŭnaj narady demakratyčnych arhanizacyj, čarhovaje pasiadžeńnie jakoj adbyłosia 3 maja, nie zmahli damovicca ab farmiravańni adzinaha śpisa kandydataŭ u deputaty na parłamienckija vybary 2016 hoda. Pra heta paviedamiŭ staršynia arhkamiteta pa stvareńni Biełaruskaj sacyjał-demakratyčnaj partyi (Narodnaja Hramada) Mikałaj Statkievič.
Pavodle jaho słoŭ, pradstaŭniki Partyi BNF, Biełaruskaj partyi levych «Spraviadlivy śviet» i Biełaruskaj sacyjał-demakratyčnaj partyi (Hramada) vystupili suprać stvareńnia adzinaha śpisa. «Adzinaje rašeńnie, jakoje zmahli pryniać, tyčycca praciahu abmierkavańnia niejkaj kaardynacyi dziejańniaŭ kandydataŭ u deputaty. Prapanoŭvałasia abnarodavać śpisy ŭsich apazicyjnych kandydataŭ, kab jany mahli damovicca, a nie łajacca adzin z adnym», — paviedamiŭ palityk.
Statkievič ličyć, što biez adzinaha śpisa kandydataŭ nielha kazać pra «realnuju kaalicyju» demakratyčnych sił. «Heta ŭzmacniaje značnaść Biełaruskaha nacyjanalnaha kanhresa, praviadzieńnie jakoha zapłanavana na 15 maja. Jon moža pakłaści pačatak pabudovie realnaj demakratyčnaj kaalicyi i ahučyć adziny śpis kandydataŭ», — skazaŭ jon.
Staršynia Partyi BNF Alaksiej Janukievič ličyć, što taktyka farmiravańnia ŭłasnych partyjnych śpisaŭ va ŭmovach adsutnaści demakratyčnych vybaraŭ źjaŭlajecca «najbolš efiektyŭnaj». «Pierad partyjaj na vybarach staić zadača raspaŭsiudžvać svaje idei i ŭpłyŭ u hramadstvie. Źniaćcie našych kandydataŭ na karyść inšych, niejkija sproby abjadnańnia ź inšymi arhanizacyjami nie pryviaduć da dadatkovaj vyhady, a tolki demabilizujuć častku našych prychilnikaŭ i aktyvistaŭ», — rastłumačyŭ BiełaPAN pazicyju svajoj arhanizacyi Janukievič.
Jon nahadaŭ pra rašeńnie sojma partyi, jakoje praduhledžvaje farmiravańnie na vybary 2016 hoda svajho ŭłasnaha śpisa kandydataŭ. «Farmiravańnie śpisa prachodzić aktyŭna, na siońnia ŭ im bolš za 70 patencyjnych kandydataŭ. Na sojmie 14 maja płanujecca zaćvierdzić partyjnaje pasłańnie», — paviedamiŭ palityk.
Akramia taho, udzielniki siońniašniaha pasiadžeńnia kansultatyŭnaj narady demakratyčnych arhanizacyj pryniali rehłamient svajoj pracy. U adpaviednaści ź im, paviedamiŭ Statkievič, rašeńni narady nosiać rekamiendacyjny charaktar.
Rašeńnie ab stvareńni pastajanna dziejnaj kansultatyŭnaj narady demakratyčnych arhanizacyj pryniali 15 krasavika ŭ Minsku pradstaŭniki Abjadnanaj hramadzianskaj partyi, Partyi BNF, Biełaruskaj sacyjał-demakratyčnaj partyi (Hramada), Biełaruskaj partyi levych «Spraviadlivy śviet», ruchu «Za Svabodu», kampanii «Jeŭrapiejskaja Biełaruś», ruchu salidarnaści «Razam», niezaležnaha prafsajuza REP, arhkamitetaŭ pa stvareńni partyi «Biełaruskaja chryścijanskaja demakratyja», Biełaruskaj sacyjał-demakratyčnaj partyi (Narodnaja Hramada). Paźniej heta rašeńnie padtrymali arhkamitety partyi «Biełaruski ruch», Partyi pracoŭnych, Partyi žančyn «Nadzieja» i Partyi svabody i prahresu.
Čarhovyja parłamienckija vybary ŭ Biełarusi projduć 11 vieraśnia. Čakajecca, što aficyjna start kampanii budzie dadzieny 7 červienia.
Kamientary