Zadača zachavańnia finansavaj stabilnaści vychodzić na pieršy płan, zajaviŭ staršynia praŭleńnia Nacyjanalnaha banka Pavieł Kałaŭr na pres-kanfierencyi 6 maja ŭ Minsku.
Situacyja ŭ realnym siektary ekanomiki niaprostaja, što adlustroŭvajecca na stanie bankaŭskaj sistemy, skazaŭ jon.
Pryblizna 30% pradpryjemstvaŭ, zhodna sa źviestkami apošniaj spravazdačnaści, majuć straty. «Situacyja ŭ realnym siektary pryvodzić da rostu prablemnych aktyvaŭ. Dola takich aktyvaŭ u pieršym kvartale pavialičyłasia z 6,8 da 11,5% na 1 krasavika. Hetaja tendencyja akazvaje pavyšany nacisk na banki», — skazaŭ Kałaŭr.
Kiraŭnik Nacbanka paviedamiŭ, što ŭ krasaviku padčas vizitu misii MVF i Suśvietnaha banka vyvučałasia situacyja ŭ finansavym siektary. «Praviedzienaje nami abśledavańnie sumiesna z zamiežnymi ekśpiertami pakazvaje na mahčymy rost prablemnych daŭhoŭ, adnak hetaja situacyja kiravanaja», — ličyć Kałaur. Pry hetym jon adznačyŭ, što zaraz mižnarodnyja aŭdytarskija kampanii pravodziać niezaležnuju acenku jakaści aktyvaŭ biełaruskich bankaŭ. «Viadziecca praca, takim čynam, pa vyjaŭleńni schavanych ryzyk u bankaŭskaj sistemie», — skazaŭ kiraŭnik Nacbanka. Vyniki niezaležnaj acenki mohuć źjavicca ŭ lipieni.
U jakaści adnoj ź mier, skiravanych na zabieśpiačeńnie stabilizacyi bankaŭskaha siektara, Kałaur nazvaŭ pracu pa stvareńni śpiecyjalizavanaha ahienctva. «Nacbank i ŭrad ŭnieśli prapanovu pa ačystcy asobnych bankaŭ ad «taksičnych» aktyvaŭ. U krainie pavinna być stvoranaje śpiecyjalizavanaje ahienctva, jakomu takija aktyvy mohuć być pieradadzienyja», — ličyć Kałaŭr.
Paralelna z hetym, dadaŭ jon, u metach zabieśpiačeńnia finansavaj stabilnaści ŭłaśniki bankaŭ prapracoŭvajuć pytańnie ab dakapitalizacyi bankaŭ «tam, dzie heta nieabchodna».
Kamientary