Statkievič: U vypadku falsifikacyj na parłamienckich vybarach Biełaruski nacyjanalny kanhres inicyjuje akcyi pratestu

U vypadku falsifikacyj padčas parłamienckich vybaraŭ, što majuć adbycca, Biełaruski nacyjanalny kanhres, ustanoŭčy schod jakoha prajšoŭ u minułyja vychodnyja, inicyjuje akcyi pratestu. Takuju zajavu zrabiŭ kandydat u prezidenty na vybarach 2010 hoda, eks-palitviazień Mikałaj Statkievič 16 maja ŭ Minsku na kruhłym stale «Jeŭrapiejskaja palityka susiedstva — čakańni Biełarusi».

Statkievič adznačyŭ, što mnohija apazicyjnyja lidary nie padtrymali inicyjatyvu praviadzieńnia kanhresa, u adroźnieńnie ad členaŭ ich partyj u rehijonach. Jon padkreśliŭ, što biez abjadnańnia ŭ apazicyi ničoha nie atrymajecca, i znoŭ zaklikaŭ usich prysutnych pradstaŭnikoŭ apazicyi dałučycca da pracy kanhresa.

«Vybaraŭ niama, ale ŭ nas čamuści ŭžo siem śpisaŭ ad apazicyi, — skazaŭ Statkievič. — U nas vybary ŭ adzin tur pa mažarytarnaj sistemie, i ad ułady budzie tolki adzin kandydat na kožnym učastku».

Pavodle słoŭ palityka, padychod apazicyi da parłamienckich vybaraŭ źjaŭlajecca biezadkaznym. «My prapanavali schiemu, jak pamienšyć škodu ad hetaha. Adna sprava, kali ŭ nas zabirajuć pieramohu, i ŭsie heta bačać. Inšaja sprava, kali sami kradziem pieramohu ŭ siabie. My prapanoŭvajem vybrać adnaho kandydata na akruhu», — zajaviŭ palityk.

Sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski padkreśliŭ, što palityka adkrytaści ŭ dačynieńni da Biełarusi, jakuju pravodzić ES, źjaŭlajecca pravilnaj i nieabchodnaj z ulikam padziej, jakija adbyvajucca ŭ śviecie, u tym liku vajny va Ukrainie.

«Ale, pakul u Biełarusi niama svabodnych i sumlennych vybaraŭ, ułada zastajecca nielehitymnaj, — skazaŭ Rymašeŭski. — Usie pieramovy ź biełaruskimi ŭładami pavinny vieścisia z razumieńniem taho, što biełaruskija ŭłady nie majuć lehitymnych padstaŭ pradstaŭlać biełaruski narod».

Staršynia ruchu «Za Svabodu» Alaksandr Milinkievič padkreśliŭ važnaść taho, kab pytańnie pra Biełaruś zastavałasia ŭ paradku dnia ES. Dyjałoh ź Biełaruśsiu pavinien hruntavacca na jeŭrapiejskich kaštoŭnaściach, być pakrokavym i «z peŭnymi ŭmovami», adznačyŭ jon.

«Zaŭsiody jość spakusa vieści dyjałoh tolki z uładaj, tamu što jana ŭsio kantraluje i moža ŭpłyvać na ŭsie pracesy. Ale važna mieć znosiny i z demakratyčnaj častkaj hramadstva», — skazaŭ Milinkievič.

Staršynia partyi BNF Alaksiej Janukievič zaklikaŭ pryniać vyraznuju «darožnuju kartu» raźvićcia adnosinaŭ Biełarusi i ES. Jon taksama adznačyŭ, što nie tolki ES sprabuje zacikavić i ŭtrymać Biełaruś. «Rasija aktyŭna pracuje nie tolki ź biełaruskaj uładaj, ale i z hramadstvam, — skazaŭ Janukievič. — Układajucca finansavyja, infarmacyjnyja, arhanizacyjnyja resursy, kab atrymać tut prychilnikaŭ «ruskaha śvietu». Kali Rasiju nie spynić va Ukrainie, Biełarusi, to potym daviadziecca vyrašać inšyja zadačy ŭ Polščy i krainach Bałtyi».

Janukievič taksama zajaviŭ: «Łukašenka nie viečny, rana ci pozna jon sydzie, tamu važna ŭžo ciapier prapracoŭvać, jak dapamahčy biełarusam abaranić svoj jeŭrapiejski vybar».

Adzin ź lidaraŭ kampanii «Havary praŭdu» Taćciana Karatkievič zajaviła, što asnoŭnaj zadačaj u hetaj struktury ličać «farmiravańnie palityčnaha popytu ŭ hramadstvie na pieramieny».

«Kab sfarmiravać popyt na reformy ŭ hramadstvie, my pavinny ŭjaŭlać dla hramadstva vyraznuju alternatyvu vyrašeńnia kankretnych zadač, jakija tyčacca ekanomiki, adukacyi, achovy zdaroŭja. I my pavinny zabiaśpiečyć maksimalna šyroki ŭdzieł hramadstva ŭ palitycy na ŭsich uzroŭniach», — zajaviła Karatkievič.

Pavodle jaje słoŭ, inicyjavany «Havary praŭdu» dyjałoh unutry krainy pakul nie prynosić vynikaŭ, ale i škody taksama, tamu jaho nieabchodna praciahvać.

Karatkievič taksama adznačyła, što kampanija nie svarycca ni z kim unutry apazicyi. Pavodle jaje słoŭ, zamiest taho kab zahadzia kazać ab niesumlennaści vybaraŭ, nieabchodna «skancentravacca na tym, kab vybary prajšli narmalna». Jana nahadała, što «Havary praŭdu» nastojvaje na tym, kab u skład kožnaj vybarčaj kamisii ŭ krainie byli ŭklučany pradstaŭniki demsił. Dla hetaha spatrebicca kala 6 tys. čałaviek, a jašče 10 tys. — dla nazirańnia za vybarami, skazała Karatkievič.

Namieśnik staršyni ruchu «Za Svabodu» Juryj Hubarevič nazvaŭ źniaćcie sankcyj ES ź Biełarusi «avansam režymu». «Režym razumieje, što, ŭdała pradaŭšy parłamienckija vybary, moža vielmi šmat atrymać, — skazaŭ jon. — Da hetaha ŭžo idzie padrychtoŭka. Situacyja moža raźvivacca dvuma šlachami. Pieršy — biez sapraŭdnych vybaraŭ pryznačyć niekalkich apazicyjanieraŭ u parłamient, jak heta adbyvajecca ŭ Rasii. Druhi — naohuł ničoha nie rabić, skazaŭšy, što byli ŭsie mahčymaści dla kankurencyi».

Hubarevič padkreśliŭ, što pradstaŭniki apazicyi pavinny być uklučany ŭ składy vybarčych kamisij, a padlik hałasoŭ pavinien być prazrystym dla vybarščykaŭ.

Palityk Uładzimir Niaklajeŭ zaklikaŭ apazicyju nie ŭdzielničać u vybarach, kali nie buduć uniesieny źmieny ŭ vybarčaje zakanadaŭstva. Na jaho dumku, apazicyja jašče moža sabracca i vyznačyć adziny padychod da parłamienckich vybaraŭ, kab ES było zrazumieła, jakija ŭmovy vystaŭlać biełaruskim uładam.

Staršynia Abjadnanaj hramadzianskaj partyi Anatol Labiedźka nazvaŭ siońniašniuju sustreču «maleńkaj pieramohaj». «Dla nas było vielmi važna sabracca na takuju sustreču mienavita ŭ Minsku», — skazaŭ jon, dadaŭšy, što ŭ apazicyi pastupova vučacca słuchać adzin adnaho.

Labiedźka padkreśliŭ, što ŭ ciapierašniaj parłamienckaj kampanii treba stavić «realistyčnyja mety i zadačy». «Realistyčnaja zadača — istotna pavialičyć kolkaść udzielnikaŭ vybarčaha i palityčnaha pracesu», — zajaviŭ jon.

• 0
• 0
• 0
• 0
• 0
• 0
• 0
• 0