Havał viarnuŭsia ŭ dramaturhiju

Čamu strata ŭłady aznačaje dla niekatorych stratu sensu žyćcia? Pra heta novaja pjesa eks‑prezydenta Čechii Vacłava Haŭła.

Staŭšy lideram českaje apazycyi, padpolla, Vacłaŭ Havał praciahvaŭ pisać, a voś kali ŭ 1989 hodzie staŭ prezydentam Čechii — spyniŭ. I voś jon viarnuŭsia ŭ teatar. «Sychod» — jaho pieršaja pjesa za 20 hod — była pastaŭlenaja ŭ praskim teatry «Archa» 20 traŭnia.

Čamu strata ŭłady aznačaje dla niekatorych stratu sensu žyćcia? Čamu ŭłada dla niekatorych ludziej maje takoje značeńnie, što adłučeńnie ad jaje značyć rujnavańnie ŭsiaho ichniaha śvietu? Pa adychodzie z pasady prezydent Čechasłavaččyny z 1989 pa 1992 hh. i Českaj Respubliki z 1993 pa 2003 hh. mieŭ dosyć času, kab parazvažać nad hetymi pytańniami.

«Sychod» — vynik razvahaŭ.

Hałoŭny hieroj pjesy Vacłava Haŭła — Ryhier, były kiraŭnik nienazvanaj dziaržavy. Ryhiera źmianiŭ na pasadzie jahony namieśnik Klajn. Abkružany cieniavymi biznesoŭcami, Klajn zahadvaje vyhnać Ryhiera z šykoŭnaj viły, pavysiakać višniovy sad i pabudavać na jaho miescy handlovy punkt, kazino j bardel.

Niekatorym padalisia sprečnymi aluzii na čechaŭski «Višniovy sad» i šekśpiraŭskaha «Karala Lira». Akramia taho, mnohija ŭbačyli ŭ asobie Klajna namiok na byłoha praciŭnika Haŭła — Vacłava Kłaŭsa, novaha prezydenta krainy. Adnak sam aŭtar nia ličyć, što jahony persanaž asabliva abaviazany svaim naradžeńniem prezydenckamu nastupniku.

Pjesa — pra toje, jak ciažka viarnucca da narmalovaha žyćcia čałavieku, jaki straciŭ uładu. Viarnucca da narmalovaha žyćcia — nia značyć pryzvyčaicca karystacca zvyčajnym mabilnikam. Zadača ŭ tym, kab znajści ŭnutrany spakoj — niahledziačy na toje, što ciabie ślepiać vybliski kameraŭ šmatlikich paparacy.

Českaja krytyka piša, što dziesiacihodździe va ŭładzie pajšło Haŭłu‑dramaturhu na karyść. Heta pieršy tvor, jaki jon napisaŭ, majučy za plačyma bahaty žyćciovy dośvied. Raniej Vacłaŭ Havał pisaŭ jak apanent systemy, nie miarkujučy, što niekali trapić va ŭładu.

«Sychod» — pjesa, napisanaja ŭžo paśla taho, jak jon hetuju systemu prajšoŭ naskroź. Niahledziačy na hady prezydenctva, Vacłaŭ Havał zachavaŭ zdolnaść da samarefleksii j nie vahaŭsia ŭ «Sychodzie» navat pierad samaparodyjaj.

Premjera sabrała šmat hledačoŭ. U 71 hod Haŭłu jość čym zaniacca, akramia spravaŭ uradovych.

• 0
• 0
• 0
• 0
• 0
• 0
• 0
• 0