Kab pakłaści 2 rubli na telefon, daviadziecca addać Biełarusbanku 1 rubiel kamisii: padrabiaźniej pra novaŭviadzieńnie

Za što buduć brać 1 novy rubiel?

Faktyčna, za adzin padychod da kasavaha akienca. Ad 1 žniŭnia, kali vy zachočacie apłacić niejkija pasłuhi ŭ kasach Biełarusbanka, daviadziecca da ahulnaj sumy dadać adzin rubiel. Pry hetym niavažna, adzin u vas rachunak, albo adrazu dziesiać. U abodvuch vypadkach bank paprosić u vas adzin rubiel kamisii i nie bolš.

Ci voźmuć kamisiju, kali ja zachaču pakłaści ŭsiaho dva rubli na rachunak mabilnika?

Tak, voźmuć: kasiru Biełarusbanka daviadziecca addać nie dva, a try rubli. «Pamier zboru fiksavany i nie zaležyć ad sumy płaciažu. U vypadku, jaki vy nazyvajecie, ja b paraiła skarystacca terminałam samaabsłuhoŭvańnia», — havorać u pres-słužbie Biełarusbanka.

Što z terminałami?

Tut usio narmalna i pa-raniejšamu. Jany nie buduć brać u vas kamisiju. Tamu kali chočacie ekanomić i raniej nie karystalisia hetymi dziŭnymi štukovinami — samy čas navučycca.

Ci daviadziecca addavać rubiel, kali ja zachaču pamianiać valutu?

Nie. Kamisiju Biełarusbank źbirajecca brać tolki za pryjom płaciažoŭ, tamu kali vy zachočacie abmianiać rubli na jeŭra albo jeŭra na rubli, nichto vaš adzin rubiel sabie nie zabiare.

Jakija jašče jość vyklučeńni?

Vyklučeńniaŭ davoli šmat. Kamisija nie budzie zabiracca, kali vy zachočacie pieravieści hrošy na dabračynnaść, zapłacić pa kredycie, uziatym u Biełarusbanku, pravieści płaciež praz kasira z dapamohaj ułasnaj bankaŭskaj kartki. Taksama vyzvalenyja ad rublovaj kamisii vieterany Vialikaj Ajčynnaj vajny. Nie voźmuć z vas rubla i tady, kali vy zachočacie papoŭnić svoj ułasny rachunak.

Pavialičyć

Kudy pojduć hrošy?

Na dabračynnaść. Heta ŭsio, što viadoma na dadzieny momant. U Biełarusbanku Jeŭraradyjo paviedamili, što bolš kankretna pakul nie mohuć skazać. Usio budzie zaležać ad sabranaj sumy. «A raptam zaraz usie zachočuć ekanomić i navučacca karystacca terminałami i internet-bankinham?» — havorać tam. Adnak u advarotnym vypadku ŭsie sabranyja hrošy buduć nakiravanyja na dabračynnyja mety paśla kansultacyi ź Ministerstvam sacyjalnaj abarony.

Navošta ŭsio heta?

U Biełarusbanku Jeŭraradyjo tłumačać, što i tak amal apošnimi pajšli na taki krok: «Tolki Biełahraprambank zastaŭsia, usie daŭno pierajšli na zbor kamisii». Niaciažka taksama zdahadacca, što takim čynam banki sprabujuć abaranicca ad vializnych čerhaŭ achvočych apłacić kamunalnyja płaciažy. Mahčyma, ciapier ludzi nasamreč buduć vučycca karystacca inšymi mietadami apłaty.

Ci zakonnyja takija kroki bankaŭ?

Z takim pytańniem źviartajemsia da pres-sakratara Nacyjanalnaha banka Alaksandra Cimašenki. Jon paćviardžaje: heta zakonny krok. Usie biełaruskija banki mohuć samastojna vyznačać pamier kamisii, jakuju buduć źbirać za praviadzieńnie płaciežnych apieracyj.

• 0
• 0
• 0
• 0
• 0
• 0
• 0
• 0