Padčas vyvučeńnia soplaŭ navukoŭcy adkryli novy vid antybijotykaŭ. I toje, što ŭ nosie mužčyn z baradoj, jak praviła, mienš škodnych mikraarhanizmaŭ

Apošni raz novy kłas antybijotykaŭ byŭ adkryty ŭ 1980-ch hadach. Praktyčna ŭsie antybijotyki da hetaha byli vyjaŭlenyja ŭ kałonijach hlebavych bakteryj, adnak navukoŭcy ź Ciubinhienskaha univiersiteta ŭ Hiermanii ŭpieršyniu vyrašyli źviarnucca ŭ svaich daśledavańniach da čałaviečaha cieła. Jany miarkujuć, što naša cieła — nievyčerpnaja krynica novych lekaŭ.

Strašnyja supierbakteryi

Naša cieła nie zanadta padobnaje na pole boju, ale na mikraskapičnym uzroŭni ŭnutry jaho ŭvieś čas idzie baraćba pamiž kankurujučymi vidami bakteryj. I, jak daŭno zdahadvalisia navukoŭcy, adzin ź vidaŭ zbroi ŭ hetaj baraćbie — heta antybijotyki.

Siarod bakteryj, jakija lubiać brać šturmam čałaviečy nos, — załacisty stafiłakok. A taksama jaho supiervid — mietycylinrezistentny załacisty stafiłakok (MRSA), ŭstojlivy da bolšaści antybijotykaŭ. Jon žyvie ŭ nosie 30% usich ludziej. Ale jak nakont astatnich 70%?

Pavialičyć

Navukoŭcy vyjavili, što ludzi z kankurujučaj bakteryjaj Staphylococcus lugdunensis, jakaja žyvie ŭ ich nasach, ź mienšaj vierahodnaściu buduć atakavanyja niebiaśpiečnym załacistym stafiłakokam. Zatym jany vykarystali niekalki štamaŭ hienietyčna madyfikavanaj Staphylococcus lugdunensis, kab vyśvietlić, jakaja mienavita častka jaje hienietyčnaha koda akazałasia vyrašalnaj u baraćbie za miesca ŭ nosie.

Mienavita tak adbyłosia važnaje adkryćcio — adzin vyrašalny hien utrymlivaŭ infarmacyju, jakuju navukoŭcy vykarystali dla stvareńnia novaha antybijotyka, jaki atrymaŭ imia «łuhdunin».

Daśledavańnie na łabaratornych myšach pakazała, što łuhdunin zdolny lačyć skurnyja infiekcyi, vyklikanyja supierbakteryjami, u tym liku mietycylinrezistentnym załacistym stafiłakokam i fiekalnym enterakokam.

«Niekatoryja z paddoślednych žyvioł całkam vylečylisia — na ich nie zastałosia nivodnaj kletki bakteryi. U inšych vypadkach kolkaść bakteryj skaraciłasia, častka ź ich zastałasia, ale my taksama ŭbačyli, što hetaje rečyva pranikła ŭhłyb tkaniny i dziejničała na bolš hłybokich płastach skury», — raspaviadaje adzin z navukoŭcaŭ, Biernchard Kryśmier.

Pierš jak łuhdunin budzie prapanavany pacyjentam, musiać prajści hady daśledavańniaŭ, jakija, akramia ŭsiaho inšaha, mohuć pakazać, što novy antybijotyk nie maje zajaŭlenaj efiektyŭnaści.

Ale ŭ lubym vypadku, adkryćcio novych antybijotykaŭ nieabchodna. Miedyki pa ŭsim śviecie ŭsio čaściej sutykajucca z tym, što infiekcyi vypracoŭvajuć ustojlivaść da najaŭnych ciapier preparataŭ, a značyć, rana ci pozna mohuć stać nievylečnymi.

«Całkam mahčyma, što heta daśledavańnie — pieršaje ŭ čaradzie mnohich, jakija dakazvajuć, što bakteryi ŭnutry našaha arhanizma mohuć vyrablać novyja antybijotyki z novymi chimičnymi strukturami», — ličyć prafiesar Kolin Harnier, kiraŭnik brytanskaha Centra daśledavańnia antybijotykaŭ.

«Naprykład, — kaža jon, — niadaŭna byŭ apublikavany dakład pra toje, što ŭ mužčyn z baradoj mienš škodnych mikraarhanizmaŭ (uklučajučy mietycylinrezistentny załacisty stafiłakok), čym u mužčyn, jakija holacca».

«Heta daje padstavy razhladać adkryćcio łuhduninu u tym ža kantekście, što i najaŭnaść raślinnaści na tvary — jak štości takoje, što abaraniaje nas ad infiekcyj», — dadaje prafiesar.

• 0
• 0
• 0
• 0
• 0
• 0
• 0
• 0