Pamyłkovaje ŭvarvańnie da ŭkrainki ŭ Minsku. Milicyja: «Heta nie našy supracoŭniki»

Ranicaj 17 žniŭnia ŭ kvateru Natalli, jakaja razam z mužam pierajechała ŭ biełaruskuju stalicu z Kijeva, «zavitali» ludzi, jakija pradstavilisia milicyjantami. Adnak minskaje UUS admaŭlaje, što maje da hetaha dačynieńnie.

Pa słovach žančyny spačatku joj pazvanili ŭ damafon, paviedamili, što «heta milicyja».

«Ja kažu ŭ słuchaŭku, što adkryvać nie budu, bo doma adna, i čuju, što jon nie adzin. Prašu pakazać u kamieru dakumienty: «Ja patelefanuju ŭ milicyju i ŭdakładniu, ci vy heta». Nie paśpieła dahavaryć, jak niekalki noh vybivali toŭstyja braniravanyja dźviery. Susiedzi puścili ich u tambur, dom elitny, jany vielmi chvalavalisia, kali chtości nie zakryvaŭ tambur: videanazirańnie, kvatery pa $ 300—400 tys., nasuprać Pałac Niezaležnaści. Ja paprasiła ich ahučyć pryčyny takich pavodzinaŭ, ale milicyja praciahvała. Ja ŭžo praz dryžačyja vusny prasiła ich udakładnić pryčynu.

Pavialičyć

Ich było troje. Mianie vyšturchnuli i zajšli. Ja paśpieła patelefanavać mužu, pakul jany łamali dźviery.

Dobra, što paśpieła. Potym mnie nie dali navat u ruki ŭziać telefon. Sieli za stoł i pačali pisać. Ja nie supakojvałasia i patrabavała nazvać pryčyny, ahučvała svaje hramadzianskija pravy, patrabavała pakazać dakumienty bližej, bo drenna baču. Jany pačali niešta pisać, paprasili apranucca, ja admoviłasia, bo nie daviaraju im i susiedziam taksama, tamu nie pakinu ich adnych, - padzialiłasia historyjaj u svaim Fejsbuku Natalla. - Ja ŭziała telefon i skazała, što pazvaniu ŭ milicyju, ukluču hučnuju suviaź, ale mianie izalavali ad telefona i skazali: «Pozna, usio ŭžo, dziaŭčyna, pozna». Jany afarmlali pieratrus, kazali, što sprava rasśledavałasia daŭno, što heta vosiem hadoŭ. Ja ŭžo pačała kryčać, kab chtości telefanavaŭ u milicyju. Maŭlaŭ, ja nie dam vam ničoha rabić, pakul nie pryjedzie Ženia (muž), juryst, chtości z konsulstva ci haspadar kvatery. Kali skazała, što biez pradjaŭleńnia abvinavačvańnia jany nie mohuć ździajśniać nijakija dziejańni ŭ majoj kvatery, jany skazali: «My ciapier nadzieniem na vas kajdanki, kali budziecie supraciŭlacca».

Ale toj, chto afarmlaŭ pieratrus, skazaŭ: «Stop, jaki Ženia? Chto tut žyvie?».

Dalej jany vyrašyli pakazać razdrukavanaje fota złačyncy. Ja skazała, što nie viedaju, chto heta. Heta była pamyłka, a jany ž navat nie paprasili dakumienty.

Pryjechaŭ muž, pahutaryŭ ź imi. Sychodziačy, jany skazali: «Prosim prabačeńnia. My tak stavilisia da vas, bo dumali, što vy — złačynca».

Pa infarmacyi Natalli da jaje «zavitaŭ» ABEZ pa spravie źviazanaj z padatkami. Adnak, u UUS Minska paviedamili, što da milicyi «hości» dačynieńnia nie majuć.

— Heta byli nie supracoŭniki milicyi, — skazaŭ «Našaj Nivie» pres-sakratar HUUS Minharvykankama Alaksandr Łastoŭski. — My ŭžo havaryli z hetaj žančynaj. Pravierka pa hetym vypadku praciahvajecca. Pakul mahu skazać tolki toje, što supracoŭniki orhanaŭ unutranych spraŭ pa hetym adrasie nie vyjazdžali».

Paźniej Natalla paviedamiła, što da jaje pryjazdžaŭ načalnik kryminalnaj milicyi horada. I vybačyŭsia.

— Da mianie asabista pryjechaŭ načalnik kryminalnaj milicyi Minska i śledčy, zadaŭ pytańni. Niekalki razoŭ paprasiŭ prabačeńnia i skazaŭ: «Vy pryjechali ŭ pravavuju krainu, dzie takoje prosta tak nie pakinuć».

Nahadajem, zusim niadaŭna adbyłasia padobnaja historyja: siłaviki šturmavali kvateru minskaha ŭrača-piedyjatra, jakoha pierabłytali z ekshibicyjanistam. U adroźnieńnie ad Natalli, mužčyna pravioŭ noč za kratami i vybačeńni jamu tak nichto i nie prynios.

• 0
• 0
• 0
• 0
• 0
• 0
• 0
• 0