Mižnarodny valutny fond raić biełaruskim uładam pryvieści standarty buchuliku ŭ adpaviednaść ź mižnarodnymi. Dziejnyja praviły viadzieńnia buchuliku, na dumku MVF, mohuć skažać finansavuju spravazdačnaść kampanij.
U suviazi z hetym fond rekamienduje ŭnieści papraŭki ŭ zakon «Ab buchhałtarskim uliku i spravazdačnaści» i pryvieści jaho ŭ adpaviednaść ź mižnarodnymi standartami finansavaj spravazdačnaści (MSFS).
Pavodle infarmacyi BiełaPAN, MVF, u pryvatnaści, rekamienduje ŭžo ŭ 2017 hodzie stvaryć u Biełarusi niezaležny orhan, jaki budzie ŭpaŭnavažany zajmacca ŭkaranieńniem u krainie standartaŭ buchuliku zhodna z MSFS.
MVF taksama prapanoŭvaje raspaŭsiudzić na ŭsie dziaržpradpryjemstvy abaviazak padrychtoŭki finansavaj spravazdačnaści pavodle mižnarodnych standartaŭ.
Zhadanyja rekamiendacyi abumoŭlenyja tym, što dziejnyja praviły viadzieńnia buchhałtarskaha ŭliku ŭ Biełarusi mohuć, na dumku MVF, skažać finansavuju spravazdačnaść kampanij. Naprykład, ličać ekśpierty fondu, biełaruskaja praktyka spynieńnia naličeńnia amartyzacyi, a taksama pieraacenka asnoŭnych fondaŭ z prymianieńniem štučna ŭstanoŭlenych kaeficyjentaŭ moža pryvodzić da taho, što finansavaja spravazdačnaść nie adlustroŭvaje realnaje stanovišča spraŭ u kampanijach.
Nahadajem, urad i Nacyjanalny bank pryniali 19 žniŭnia sumiesnuju pastanovu, zhodna ź jakoj z 1 studzienia 2017 hoda ŭ Biełarusi ŭvodziacca mižnarodnyja standarty finansavaj spravazdačnaści ŭ jakaści techničnych narmatyŭna-pravavych aktaŭ. Adnak, jak tłumačać pradstaŭniki rynku aŭdytarskich pasłuh, aficyjnaje ŭviadzieńnie ŭ Biełarusi MSFS z 2017 hoda pakul nie aznačaje, što nacyjanalnyja standarty buchhałtarskaha ŭliku pierastajuć dziejničać.
«Uviedzienyja ŭ jakaści techničnych narmatyŭnych aktaŭ mižnarodnyja standarty nie zamianiajuć saboj zakanadaŭstva ab buchhałtarskim uliku. Pakolki takoje zakanadaŭstva nie admianiajecca, to ŭsie subjekty, jakija traplajuć pad dziejańnie zakona «Ab buchhałtarskim uliku i spravazdačnaści», abaviazanyja praciahvać vieści buchhałteryju zhodna z nacyjanalnymi standartami», — havorycca u kamientaryi kampanii «Bejkier Cili Bieł» da pryniataha ŭradavaha rašeńnia.
U toj ža čas, adznačajuć ekśpierty, u Biełarusi pavodle dziejnaha zakanadaŭstva hramadska značnyja arhanizacyi, a taksama banki pavinny rychtavać spravazdačnaść u adpaviednaści z MSFS.
«Mienavita dla hetych subjektaŭ buduć abaviazkovyja dla prymianieńnia MSFS, što ŭvodziacca z 2017 hoda, u jakaści techničnych narmatyŭna-pravavych aktaŭ. Astatnim arhanizacyjam nieabchodna budzie kiravacca imi tolki ŭ vypadku, kali ŭ ich uźniknie z-za niejkich pryčyn nieabchodnaść u składańni spravazdačnaści pavodle MSFS», — tłumačać śpiecyjalisty aŭdytarskaj kampanii.
Ciapier čytajuć
Zorka brejkdansu ź Viciebska atrymaŭ 11 hadoŭ turmy ŭ Kitai. Što zdaryłasia?11
Kamientary