Jak vybarčyja kamisii na ŭschodzie Biełarusi «zabylisia» na pracoŭnych mihrantaŭ KARTA
«Naša Niva» praciahvaje sieryju materyjałaŭ pra dzivosy elektaralnaj statystyki na vybarach u Biełarusi. Papiaredni raz my raskazvali pra niejmaviernyja ličby niesapraŭdnych biuleteniaŭ, a ciapier praciahniem raspoviedam pra jaŭku na vybarach.
Bolšaść biełarusaŭ tradycyjna biare ŭdzieł u prezidenckich vybarach. Jaŭka na vybarach vysokaja šmat u čym pa pryčynie daterminovaha hałasavańnia, u jakim administracyjnymi mietadami prymušajuć paŭdzielničać ci nie pałovu vybarščykaŭ.
Jaŭka na prezidenckich vybarach 2015 hoda aficyjna skłała 87,2%. Sama pa sabie heta vielmi vysokaja ličba. Našmat bolšaja, čym u susiednich z nami i bolš dalokich krainach.
Pakazčyk jaŭki jašče bolš ździŭlaje, kali pahladzieć na jaje nie pa krainie ŭ cełym, a pa asobnych rehijonach.
Kali vieryć aficyjnym źviestkam, to ŭ niekatorych rajonach krainy jaŭka na prezidenckich vybarach 2015 hoda skłała bolš za 99%! Prykładna ŭ pałovie rajonaŭ Biełarusi nie prahałasavała na vybarach-2015 nibyta mienš za 1000 vybarščykaŭ.
Samyja nadzvyčajnyja prykłady — heta Čerykaŭski rajon Mahiloŭskaj vobłaści i Biešankovicki rajon Viciebskaj vobłaści. U apošnim u 2015 hodzie nibyta nie prahałasavała tolki 99 z 12 546 vybarščykaŭ. A ŭ Čerykaŭskim rajonie ŭ vybarach, pavodle aficyjnaj statystyki, nie ŭziali ŭdzieł tolki 84 čałavieki z 10 108 vybarščykaŭ!
Aficyjnaja statystyka: kolkaść vybarščykaŭ, jakija nie prahałasavaŭ na vybarach 2015 hoda pa rajonach Biełarusi (biez uliku abłasnych i piaci inšych bujnych haradoŭ)
Jak vidać na karcie, samaja nadzvyčajnaja (rajony, afarbavanyja ŭ čyrvony koler) i vielmi vysokaja (žoŭty koler) jaŭka nibyta nazirałasia zvyčajna va ŭschodniaj častcy krainy.
Prablema z takimi šalonymi ličbami jaŭki ŭ tym, što mnohija žychary ŭschodniaj častki Biełarusi pieryjadyčna znachodziacca na zarobkach, u asnoŭnym u Rasii. Bolšaść ź ich praciahvaje ličycca vybarščykami pa svaim pastajannym miescy žycharstva, a ŭ realnaści na pieryjad vybaraŭ znachodzicca za miežami krainy.
Pa niekatorych rajonach kolkaść pracoŭnych mihrantaŭ moža składać niekalki pracentaŭ pracazdolnaha nasielnictva. Voźmiem prynižanuju ličbu: dapuścim, 1% pracazdolnaha nasielnictva Čerykaŭščyny na momant vybaraŭ, u pačatku kastryčnika 2015 hoda, znachodzilisia albo ŭ Rasii ŭ jakaści pracoŭnych mihrantaŭ albo pa luboj pryčynie ŭ inšaj krainie, zastajučysia zarehistravanymi ŭ jakaści vybarščykaŭ pa čerykaŭskim adrasie.
Adzin pracent ad 10 108 vybarščykaŭ składaje kala 100 čałaviek. Navat taki prykładny raźlik stavić pad sumnieŭ, što z usiaho rajona nie prahałasavali ŭsiaho 84 vybarščyki. Atrymlivajecca, što akramia vybarščykaŭ, jakija ŭ realnaści na momant vybaraŭ nie znachodzilisia pa svaim miescy žycharstva, havorka pojdzie pra jaŭku ŭ 100%, kali nie bolš.
Takim čynam, uličvajučy maštaby emihracyi ź Biełarusi i pracoŭnaj mihracyi žycharoŭ uschodnich rehijonaŭ Biełarusi, ličby jaŭki ŭ 98—99% pa mnohich rajonach krainy (Loźnienski, Słaŭharadski, Krasnapolski i mnohija inšyja) vyhladajuć fantastyčna.
Ciapier čytajuć
«Na kancertach niama miesca radykalnamu nacyjanalizmu, ahresii i hvałtu». Maks Korž vykazaŭsia nakont skandału, jaki razhareŭsia paśla jaho vystupu ŭ Varšavie3737
Kamientary