Niečakany pavarot u kanflikcie na AZS: telekanał «Rośsija 24» uvohule nielha tranślavać u Biełarusi
Incydent adbyŭsia na zapraŭcy United Company pad Stoŭbcami ŭ žniŭni. Žurnalist Hleb Łabadzienka paprasiŭ pieraklučyć kanał «Rośsija 24», ale supracoŭniki admovilisia, spasłaŭšysia na zahad dyrektara pakazvać mienavita jaho.
Łabadzienka napisaŭ u knihu skarhaŭ, źviarnuŭsia ŭ Ministerstva infarmacyi, Ministerstva suviazi, da hałoŭnaha ideołaha Staŭbcoŭskaha rajvykankama, a taksama patelefanavaŭ dyrektaru zapraŭki Vitalu Kułaku. Toj skazaŭ, što kanał i nadalej budzie iści na zapraŭcy, maŭlaŭ, «na hetym kanale ludzi najbolš poŭna daznajucca pra naviny z usiaho śvietu».
Jak akazałasia, pakazvać «Rośsiju 24» supraćzakonna nie tolki na zapraŭcy, a ŭvohule ŭ Biełarusi. Pra heta Hlebu Łabadzienku raspaviała namieśnik načalnika ŭpraŭleńnia elektronnych ŚMI, zahadčyk siektara telebačańnia i radyjoviaščańnia Ministerstva infarmacyi Biełarusi Nadzieja Bielskaja. Jana była ŭ kursie situacyi na zapraŭcy i nakiravała zvarot Łabadzienki ŭ Ministerstva ŭnutranych spraŭ.
Z tłumačeńnia Ministerstva infarmacyi vynikaje, što raspaŭsiudžvać elektronnyja ŚMI maje prava tolki toj, chto ŭniesieny ŭ śpiecyjalny rejestr Mininfarmacyi, a potym zaklučyŭ damovu na tranślavańnie z kankretnym kanałam. Zapraŭka ŭ rejestr nie ŭniesienaja. Heta značyć, što im nielha pakazvać nie tolki «Rośsiju 24», a praktyčna luby kanał.
Praktyčna, bo ŭ hramadskim miescy pavodle zakona možna tranślavać tolki dzieviać kanałaŭ tak zvanaha «sacyjalnaha pakieta», siarod jakich «Biełaruś 1», «Biełaruś 2», «Biełaruś 3», «Biełaruś 5». To bok na luboj zapraŭcy, u luboj kaviarni moža być uklučany tolki adzin z dazvolenych dzieviaci.
Bolš za toje, kanała «Rośsija 24» niama navat siarod 209 zamiežnych kanałaŭ, dazvolenych dla raspaŭsiudu na terytoryi Biełarusi.
Naturalna, kali ŭ vas talerka i vy złovicie jaho, nichto vas štrafavać nie stanie. Ale kali vy zachočacie padłučyć ekran i tranślavać kanał na ścianie susiedniaha doma, to heta ŭžo budzie raspaŭsiud, i vas možna budzie pryciahnuć da adkaznaści.
«Ciapier my atrymali dobry instrumient dla baraćby z usimi kanałami, aproč dzieviaci, uklučanymi ŭ śpis dla raspaŭsiudu, — padsumoŭvaje Hleb. — Ciapier dyrektara zapraŭki Kułaka čakajuć dva sudy. Pieršy — za tranślavańnie kanała, a druhi — za adkaz na moj biełaruskamoŭny zvarot u knizie skarhaŭ pa-rusku. Try hady tamu ja ŭžo vyjhraŭ pieršy ŭ Biełarusi sud «za biełaruskuju movu» — u ŽESa, jaki taksama adkazaŭ mnie pa-rusku».
Pa druhoj častcy artykuła 22.9 Kodeksa ab administracyjnych pravaparušeńniach «Parušeńnie zakanadaŭstva ab srodkach masavaj infarmacyi» pahražaje štraf ad 20 da 50 bazavych vieličyniaŭ.
Pa artykule 9.13 Kodeksa ab administracyjnych pravaparušeńniach «Parušeńnie zakanadaŭstva ab zvarotach hramadzian i jurydyčnych asob» — štraf ad 4 da 20 bazavych vieličyniaŭ.
Takim čynam, dyrektar zapraŭki United Company pad Stoŭbcami Vital Kułak moža atrymać štraf ad 504 rubloŭ da 1470 rubloŭ.
Jak paviedamlajuć naviedniki zapraŭki, ciapier na zapraŭcy ŭklučajuć muzyčny kanał «Europa +». Što, darečy, taksama źjaŭlajecca parušeńniem zakona.
«Naša Niva» — bastyjon biełaruščyny
PADTRYMAĆ
Kamientary