Rasija prypyniła vykanańnie damovy z Amierykaj pra ŭtylizacyju jadziernaha płutoniju i patrabuje admieny sankcyj i kampiensacyi za ich

Rasijskija ŭłady prypynili rabotu pahadnieńnia ab utylizacyi zbrojevaha płutoniju. Na dumku Maskvy, Vašynhton nie vykonvaŭ uziatyja na siabie abaviazacielstvy, piša ria.ru.

Pavialičyć

Ukaz ab prypynieńni rasijska-amierykanskaha pahadnieńnia padpisaŭ prezident RF Uładzimir Pucin. U dakumiencie havorycca, što heta źviazana z «uźniknieńniem pahrozy stratehičnaj stabilnaści ŭ vyniku niedružalubnych dziejańniaŭ ZŠA».

Va ŭkazie padkreślivajecca, što płutonij nie pryznačany dla vyrabu jadziernaj zbroi abo dla inšych vajennych metaŭ.

«Realizacyja abaviazacielstvaŭ (z boku ZŠA) nie adpaviadała pałažeńniam dakumienta. Dastatkova doŭhi čas Rasija ŭ adzinočku jaho vykonvała, ale ciapier, jak havorycca va ŭkazie prezidenta, z ulikam u cełym napružanaści i hetak dalej rasijski bok nie ličyć mahčymym praciah padobnaj situacyi», — rastłumačyŭ pres-sakratar Pucina Dźmitryj Piaskoŭ.

Jak paviedamlaje VVS, Maskva adnović dziejańnie zaklučanaha z ZŠA pahadnieńnia ab utylizacyi płutoniju ŭ vypadku, kali Vašynhton admienić usie uviedzienyja ŭ dačynieńni da Rasii sankcyi i tak zvany «zakon Mahnickaha», havorycca ŭ tekście zakonaprajekta ab prypynieńni dziejańnia pahadnieńnia.

U dakumiencie, uniesienym Pucinym na razhlad u Dziarždumu, havorycca, što dziejańnie pahadnieńnia ab utylizacyi płutoniju budzie adnoŭlenaje ŭ vypadku, kali ZŠA likvidujuć «pryčyny, jakija pryviali da karennaj źmieny abstavinaŭ».

U pryvatnaści, u zakonaprajekcie ŭdakładniajecca, što havorka idzie ab skaračeńni vajennaj infrastruktury i kolkaści kantynhientu ZŠA ŭ krainach, jakija ŭstupili ŭ NATA paśla 1 vieraśnia 2000 hoda, da ŭzroŭniu, na jakim jany znachodzilisia ŭ momant ustupleńnia ŭ siłu pahadnieńnia, padpisanaha bakami ŭ tym ža 2000 hodzie.

U jakaści druhoj umovy ŭ dakumiencie nazyvajecca admiena tak zvanaha «zakona Mahnickaha», jaki dazvalaje Vašynhtonu nakładvać finansavyja i vizavyja sankcyi ŭ dačynieńni da rasijan, jakija majuć dačynieńnie da parušeńniaŭ pravoŭ čałavieka.

Akramia taho, dla adnaŭleńnia supracoŭnictva Maskva patrabuje admianić usie sankcyi, uviedzienyja ZŠA ŭ dačynieńni da Rasii paśla anieksii Kryma i pačatku ŭzbrojenaha kanfliktu ŭ Danbasie, a taksama kampiensavać joj naniesienuju hetymi sankcyjami škodu.

Pahadnieńnie ab źniščeńni płutoniju, jaki nie źjaŭlajecca nieabchodnym dla patreb abarony, Rasija i ZŠA padpisali ŭ 2000 hodzie. Damova praduhledžvała pierapracoŭku 34 ton płutoniju z kožnaha boku ŭ paliva dla atamnych elektrastancyj.

U krasaviku 2016 hodu Pucin zajaviŭ, što ZŠA nie vykanali svaju častku abaviazacielstvaŭ pa źniščeńni płutoniju. Pavodle jaho słoŭ, ZŠA nie pabudavali pradpryjemstvaŭ dla pierapracoŭki i źniščeńnia płutoniju tym sposabam, jaki byŭ zafiksavany ŭ pahadnieńni.

Pa słovach Pucina, Rasija pabudavała pradpryjemstva dla pierapracoŭki płutoniju, vykanaŭšy takim čynam svaje abaviazacielstvy pa damovie. ZŠA vyrašyli ŭtylizavać płutonij inšym sposabam — z dapamohaj śpiecyjalnych kantejnieraŭ, adnak Maskva paličyła heta parušeńniem pahadnieńniaŭ.

Amierykanski bok tady zajaviŭ, što źmianieńnie mietadu ŭtylizacyi płutoniju nie moža pryvieści da pierahladu pahadnieńniaŭ.

• 0
• 0
• 0
• 0
• 0
• 0
• 0
• 0